Tiniliw dagiti polis ti 3 a tao, a pakairamanan ti maysa nga Australiano, gapu iti panangpadasda a mangideposito iti bogus a doliar nga aggatad iti $496,000 iti maysa a banko idiay Makati City idi Mierkoles, Nobiembre 20, segun iti Southern Police District (SPD).
Binigbig ti polisia dagiti suspek a da “Emmanuel,” 42, maysa a turista nga Australiano; “Jessirose,” 59, empleado ti maysa a foundation; ken “Imelda,” 59, maysa a retirado nga accountant.
"Kinompirmar ti maysa a pannakabagi ti Bangko Sentral ng Pilipinas (BSP) a bogus dagiti kuarta kalpasan ti naan-anay nga imbestigasion," kinuna ti SPD.
"Makasuan dagiti suspek iti panaglabsing iti Artikulo 168 ti Revised Penal Code, nangruna iti Illegal Possession and Use of False Treasury or Banknotes and Other Instruments of Credit," innayon ti polisia.
Listaan dagiti nakapasa iti 2024 Philippine Bar Examination
Kinuna ni BGen. Bernard Yang, Direktor ti SPD, a pappapigsaenda ti kampaniada kontra kadagiti agar-aramid ken agiwarwaras iti bogus a kuarta babaen ti pannakitinnulongda kadagiti dadduma pay a pannakabagi ti linteg ken financing institution nangruna ket mapasangasangan ti Paskua a panagraira ti panagwaras ti bogus a kuarta.
Impalagipna pay iti publiko ti panagbalinda a nasiput no umawatda wenno mangtedda iti kuarta (papel de banko), sangonsango man nga awatenda wenno itaudda iti ATM.
(Patrick Garcia/Manila Bulletin)
