Impeksa ni Presidente Marcos ti namnamana a mapabiag manen ti panangipateg dagiti Filipino iti arte a Filipino.
Iti panangbigbig ti Pangulo kadagiti kalatakan a koro iti pagilian a nangabak itay nabiit kadagiti international competitions a nangibagianda iti Filipinas, kinunana iti panagbitlana iti Gintong Parangal iti Palasio ti Malakanyang itoy a Domingo, Nobiembre 24 a, "Namnamaek nga ita a rabii ti pangrugian ti panagsubli ti panangipateg dagiti Filipino iti arte a Filipino.”
Binigbig ti Presidente dagiti pito a grupo ti koro – University of the Philippines Manila Chorale, Quezon City Performing Arts Development Foundation, Inc. Concert Chorus, Sola Gratia Chorale, University of Mindanao Chorale, Los Cantantes De Manila, IMUSICAPELLA ken ti University of Santo Tomas Singers bayat ti seremonia.
Iti panagbitlana, kinuna ni Marcos nga "awan ti mangis-istoria" kadagiti balligi a nagun-od dagiti Filipino chorale groups iti internasional nga eksena, ket impaganetgetna a masapul a mabigbig dagitoy.
Blazers, inatiwda ti Red Lions; kasangoda ti Cardinals iti NCAA finals
"World championship level daytoy. Saan a daytoy ti choir a nangabak iti barangay fiesta. World class international level daytoy. Ket saan nga ammo dagiti Filipino. Ket rumbeng laeng a maammuanda. Ta tunggal Pinoy a makadamag iti daytoy, maipagpannakkelna met ti kina-Filipinona,” kinunana.
Innayonna a babaen ti panangbigbig kadagiti grupo ti koro, masindian manen ti panangipateg dagiti Pilipino kadagiti arte a Filipino, agraman ti musika, a, kunana, ket "napateg unay a paset ti kulturatayo.”
"Siempre, nasayaat no adda dagiti plake ken dagiti premio ken dagiti medalia ken amin dagita. Ngem masapul a mangngeg dagiti tattao ti maipapan iti dayta. Dagiti Filipino, nangruna unay, masapul nga ammoda ti maipapan iti dayta. Ket namnamaek nga ita a rabii ti umuna nga addang tapno mabigbig dagiti pudno nga artista nga adda kadatayo Ken dagiti artista a kasta la unay ti panangikumitda iti bagida iti arteda," kinuna ni Marcos.
Ad-adda pay nga intampok ti Presidente ti musika a Filipino, a "napintas a kas iti ania man a musika a mangngegmo iti sadino man a paset ti lubong."
"Ket saan nga ania man a musika ti itantandudotayo. Musika a Filipino. Siempre, naimpluensiaantayo kadagiti ganggannaet nga immay ditoy Filipinas. Ngem kaskasdi a no mangngegmo ti kanta a kundiman, Filipino dayta No mangngegmo ti samiweng ti Manila, no mangngegmo amin daytoy a musika nga aggapu iti Filipinas, Filipino dayta," kinunana.
"Ket ti kinasayaatna, kas met iti kasayaat ti ania man a musika a mangngegmo iti sadino man a paset ti lubong. Ket dayta ti gapuna a napateg unay daytoy a rabii kadatayo. Tapno maamiris dagiti tattao a talaga a napintas ti musikatayo,” innayonna.
Kalpasan ti awarding ceremony, nangipatayab dagiti Filipino chorale groups iti sumagmamano a kanta para iti Presidente ken First Lady Liza Araneta-Marcos, ket ditoy, nagbalin nga emosional ti First Lady. (Betheena Unite/Manila Bulletin// Cles B. Rambaud/Bannawag)
