Pinagduaduaan ni Bise Presidente Sara Duterte itoy nga aldaw, Martes, Nobiembre 26, ti “kinaulimek” ti Presidential Security Command (PSC) maipanggep iti kunana a pannakaipangta ti biagna, ti pamiliana, ken dagiti empleado ti Office of the Vice President (OVP).
Iti maysa a pakaammo, linagip ni Duterte nga idi nagikkat a kameng ti Gabinete ni Presidente Marcos idi Hulio, nayakar ti Vice President Security and Protection Group (VPSPG) ket naipan iti babaen ti PSC; iti kasta, kunana a naimpluensiaan ti Office of the President (OP).
Nupay dina indetalye dagiti “dokumentado a pangta” a maipagarup a naawatna, inyebkas ti Bise Presidente ti panagduaduana no akem pay laeng ti PSC ti pannakaipanamnama ti seguridadna.
File Photo/Manila Bulletin
Listaan dagiti nakapasa iti 2024 Philippine Bar Examination
“No pudno a ti PSC ket maysa a professional organization nga awan an-anakenna, apay a nakaul-ulimek maipanggep kadagiti dokumentado a pangta iti biagko, iti pamiliak, ken kadagiti empleado ti OVP? Daytoy a kinaulimek ti PSC ket pammaneknek ngarud a ti pannakaitipon ti VPSPG iti PSC ket nalawag a pangdadael iti seguridadko, awanen ti sabali,” kinunana.
Impeksa ni Duterte daytoy kalpasan a pinabileg ti PSC ti seguridad ni Marcos gapu iti kinuna ni Duterte a nangtangdan iti mangpapatay iti Presidente, ken ni First Lady Liza Araneta-Marcos, agraman ken ni House Speaker Martin Romualdez no isu a mismo (BP Duterte) ti mapapatay.
Kinuna met ti PSC iti maysa a pakaammo daytoy idi Sabado, Nobiembre 23, nga, “Ania man a pangta iti biag ti Presidente ken ti Umuna a Pamilia, asino man ti nagtaudanna—ken nangnangruna no awan as-asinna a naipubliko — mataming daytoy a naimpasnekan.
“Ibilangmi daytoy a banag a para iti nailian a seguridad ken aramidenmi ti amin a kasapulan nga addang tapno masigurado ti kinatalged ti Presidente,” innayon ti PSC. (Raymund Antonio/Manila Bulletin)
