Nagpakdaar ni Senate Minority Leader Aquilino "Koko" Pimentel III ken ni Bise Presidente (BP) Sara Duterte a mabalin a maapektaran ti badiet ti Office of the Vice President (OVP) gapu kadagiti impakitana a kababalin iti kallabes.
Dakdakamaten ni Senador Pimentel ti nabiit pay a panagpungtot ti Bise Presidente maibusor ken ni Presidente Ferdinand "Bongbong" Marcos Jr., ti asawana, ken House Speaker Martin Romualdez.
Madama a pagsasaritaan ti Senado ti 2025 General Appropriations Bill (GAB) nga addan iti period of amendments.
Kinuna ni Pimentel a gapu kadagiti pasamak ken impakita ni BP Duterte a kababalin iti kallabes, mabalin nga ikeddeng ti Senado a saanen a rumbeng a maikkan iti pondo ti OVP.
Listaan dagiti nakapasa iti 2024 Philippine Bar Examination
Sakbayna, immunan nga inyebkas ni Deputy Minority Leader Senadora Risa Hontiveros a saanen a rumbeng a manayonan ti PhP733 a milion a badiet ti OVP, ket umdasen ti naipaay iti bersion ti Kamara iti 2025 GAB.
Innayon ni Pimentel nga ania man a pangta maibusor iti biag ti nangato nga opisial ti gobierno ken dagiti kameng ti pamiliana ket rumbeng nga imbestigaren ti National Bureau of Investigation (NBI). (Dhel Nazario/Manila Bulletin//Lito Hilidon/Bannawag)
