Intuding ti National Bureau of Investigation (NBI) a mayawat ita nga aldaw, Nobiembre 26, ti subpoena ni Bise Presidente (BP) Sara Duterte mainaig iti panangipangtana a panangpapatayna ken ni Presidente Marcos, First Lady Liza Araneta Marcos, ken House Speaker Martin Romualdez.
Kinuna ti Direktor ti NBI a ni Jaime B. Santiago a yawat dagiti kameng ti NBI ti subpoena ni BP Duterte iti Office of the Vice President (OVP) ita nga aldaw.
Iti ngudo ti lawas, nangangay ni Duterte iti press conference a nangipakaammuanna a no matay, addan binilinna a maysa a tao a mangpapatay iti agassawa a Marcos ken ni Romualdez.
Kalpasan ti panangisawang ni Duterte iti daytoy, kinuna ni Duterte a saan a naawatan ti gobierno ti imbagana ket saanda nga inkankano dagiti pangta iti biagna.
Listaan dagiti nakapasa iti 2024 Philippine Bar Examination
Ngem impasigurado ni Santiago nga awan ti naawatda nga impormasion mainaig iti pangta iti biag ni BP Duterte, ket isu pay laeng ti damo a pannakangngegda maipapan iti daytoy.
Inlawawlawag ni Santiago a ti maysa a makaigapu iti panangipaulogda iti subpoena ken ni BP Duterte ket tapno pormal a maibutaktakna dagiti ibagbagana a pangta iti biagna.
Kinuna ni Santiago a maibilang a "grave threat" dagiti insawang ni BP Duterte iti kallabes, ngem inlawlawagna a saan laeng a daytoy ti mabalin nga ikasoda kenkuana.
Iti sabali a bangir, kinuna ni Santiago a pinatgan ti Facebook ti kiddaw ti NBI a pagtalinaedenda ti video a mangipakpakita iti panagpangpangta ni BP Duterte. (Jeffrey Damicog/Manila Bulletin//Lito Hilidon/Bannawag)
