Saanen a kasapulan ti "loyalty check" kadagiti kameng ti Armed Forces of the Philippines (AFP) bayat ti kumarkaro a panagrinnisiris dagiti dua a kangatuan nga opisial ti pagilian a da Presidente Ferdinand Marcos Jr. ken Bise Presidente Sara Duterte, ta nalawag ti yan ti pagtulnoganda: iti wagayway ti ken Konstitusion ti Filipinas.
Daytoy ti kinuna ni panakangiwat ti AFP Col. Francel Margareth Padilla itay Nobiembre 26, ta ammo dagiti daulo ti AFP nga aramiden ti tunggal maysa a soldado ti umisu a banag, nga isu ti panagtultuloyda a mangtungpal iti pagakmanda a mangsalaknib iti pagilian ken iti umili.
Segun ken ni Padilla, iti daytoy a punto, saan a kasapulan ti "loyalty check."
Kinuna ni Padilla a talken ni Chief of Staff ti AFP General Romeo Brawner Jr. a tunggal soldado, aramidenna ti sinapataanna a pagrebbengan, ket agtalinaed a propesional.
Kampania kontra pannakamanipular ti presio ti bagas, isayangkat ti DA
Sakbayna, kinuna ni Presidente Marcos Jr. a sarangtenna ti pangta ni Bise Presidente Sara Duterte maibusor kenkuana, iti asawana a ni Liza Araneta-Marcos, ken iti kasinsinna a House Speaker Martin Romualdez.
Iti biang ti AFP, kiniddaw ni Padilla a dida koma mairaman iti politika ta maysada a non-politikal a gunglo, kalpasan ti panangisawang ni dati a presidente Rodrigo Duterte a ti laeng militar ti makaagas iti napilay a panagturay ni Marcos. (Martin Sadongdong/Manila Bulletin//Lito Hilidon/Bannawag)
