SANTA MARIA, Ilocos Sur – Dua a menor de edad ti natay iti pannakaidungpar ti motorsikloda iti maysa a rangtay iti Barangay Laslasong itoy nga ili idi Lunes, Nobiembre 25.
Binigbig ni Police Major Macario Dulawan Jr., chief of police ditoy, dagiti biktima a da Junjun, motorcycle driver, ken ti back rider a ni Sonny, agpada a residente iti Barangay Lingsat iti daytoy nga ili.
Kinuna ni Dulawan a napukaw ni Junjun ti kontrol ti motorsiklo a nangdungpar iti kongkreto a barandilias ti rangtay.
Naipuruak dagiti biktima iti 20 a metro ti kaadayoda ken nakaro ti sugatda. Naitaray dagitoy iti maysa nga ospital a nakaideklararan dagitoy a natay gapu iti aksidente.
Cauplasan Bridge iti Ilocos Norte, agtalinaed a nakaserra agingga iti Enero 2025
Kinuna ni Dulawan nga awan ti helmet dagiti biktima ken nabartekda idi napasamak ti aksidente.
Impalagip ti polisia a di koma agmaneho ti asino man a nabartek iti ania man a lugan tapno maliklikan ti desgrasia. (Freddie Lazaro/ Manila Bulletin)
