Kinuna ti Armed Forces of the Philippines (AFP) idi kalman, Martes, Nobiembre 26, a makitinnulongda iti House of Representatives (HOR) kalpasan a nainaganan ti dua a military personnel iti imbestigasion mainaig iti mapapati a di umisu a pannakausar ti confidential ken intelligence fund ti Office of the Vice President (OVP) ken ti Departamento ti Edukasion (DepEd).
No kiddawen dagiti mammanday-linteg ti kaadda da Colonel Raymund Dante Lachica ken Colonel Dennis Nolasco iti House inquiry, masapul nga agtulnog kadakuada ti liderato ti AFP, kinuna ni military spokesperson Col. Francel Margareth Padilla.
Kabayatan ti hearing ti House Committee on Good Government and Public Accountability idi Lunes, Nobiembre 25, kinuna ni OVP special disbursement officer (SDO) Gina Acosta a ti pannakaigasto ti minilion ti gatadna a confidential funds iti babaen ti OVP ket adda iti diskresion ni Lachica, ti komander ti Vice Presidential Security and Protection Group (VPSPG).
Kabayatanna, immun-una a kinuna ni dati a Department of Education (DepEd) SDO Edward Fajarda a maysa a Col. Dennis Nolasco, maysa a security officer a naidestino iti VPSPG, ti akin-akem iti pannakaibunong ti kompidensial a pondo ti DepEd nga agdagup iti minilion a pisos.
Listaan dagiti nakapasa iti 2024 Philippine Bar Examination
Nagserbi idi ni VP Duterte a kas sekretario ti DepEd agingga a naglusulos itoy met laeng a tawen.
Aktibo a kameng ti AFP da Nolasco ken Fajarda, segun ken ni military spokesperson Padilla. Nupay kasta, imbatadna a saanen a konektado ni Nolasco iti VPSPG ta madama ti military schooling-na.
Kinunana pay a ti kakaisuna a mandato ti VPSPG, nga adda iti babaen ti direkta a panangimaton ti Presidential Security Command (PSC), ket ti panangipaay iti seguridad iti Bise Presidente ken iti asideg a pamiliana iti entero a terminona. (Martin Sadongdong/ Manila Bulletin)
