Mabalin a sumango ni Bise Presidente Sara Duterte iti adu a kaso kriminal, malaksid iti pannakaireklamo kenkuana para iti disbarment (pannakaikkat kas abogado) iti sabali pay a pakdaarna, gapu kadagiti impublikona a pangta a panangpapatay kada Presidente Ferdinand R. Marcos Jr., First Lady Liza Araneta-Marcos, ken House Speaker Martin Romualdez, segun ti Department of Justice (DOJ) itay Nob. 26.
Kinuna ni DOJ Undersecretary Margarita N. Gutierrez, iti programa a "Bagong Pilipinas Ngayon" iti PTV, a mabalin a mairaman kadagiti darum ti libel, defamation, ken grave threats.
Impinget met Duterte a saan nga aktibo a pangta ti imbagana maipapan iti panangtangdanna iti tao a mangpapatay kada Marcos, ta segun kenkuana, sabali ti nagawatan dagiti maseknan iti "lohikal a konteksto" ti impakdaarna.
Iti sabali a bangir, pinasingkedan ti Korte Suprema idi Nob. 26, a nakaawatda iti disbarment complaint a naipila kontra ken ni Duterte gapu iti imbagana a kalienna ti bangkay ni dati a presidente Ferdinand E. Marcos Sr. sana ibelleng daytoy iti West Philippine Sea. (MANILA BULLETIN)
