SAAN nga impagarup ni Charmaine Ramos Raquel, 31, a ti panagayatna unay kadagiti luto ken iti pannangan ti mangitunda kenkuana a kas maysa kadagiti nalatak ita a vlogger iti Amianan.
Ni Charmaine, babaen ti vlog-na a Charmification TV, ti mangipaneknek a malako a topiko wenno content ti maipapan iti makan wenno potahe. Aglalo no ipakita dayta a topiko ti kultura ken tradision maipapan iti taraon.
Maysa a Registered Nurse ni Charmaine wenno Charm a kas awagna kadagiti nasinged kenkuana. Nairuarna payen ti NCLEX-RN tapno makapagtrabaho koma payen iti Estados Unidos.
Kas iti kaaduan a vloggers iti Amianan, ti isasaplit ti pandemia idi 2020 ti nangirubuat iti food vlog ni Charm. Inrugina ti nagaramid iti food videos iti YouTube sa simmaruno iti Facebook babaen ti vlog-na a Charmification TV. No apay a Charmification, naadaw dayta iti naganna a Charmaine ken -fication a kayatna a sawen a “panagbalin” a kas ken ni Charmaine.
Ilegal a pannakaiserrek iti Filipinas dagiti agrikultural a produkto, siiiget a pabantayan ni Marcos
Pinullon dagiti nai-feature ni Charm a panganan, baro man wenno nabayagen, tapno ipromote-na dagitoy. Padasen ni Charm ti potahe a pagtangtangsit dayta a panganan, ket babaen ti bukodna nga estilo a panagsingkitna sa panagmulagatna ken sound effect a kasla agsul-oy kabayatan a ramananna ti taraon, adu dagiti maay-ayo iti daytoy. Adda pay nakasarsaritami a follower ni Charm nga uray kano nalpasen a nangan no makitana ni Charm a mangramraman iti inorderna a masida, kasla mabisin manen!
Iti biang ni Charm, awan kano met ti pinampanunotna idi a formula no kasano ti panag-vlog-na tapno makaallukoy iti viewers; ti nasken, agbalin a natural. Awan pay script-na isu a kanayon nga impromptu no ag-voice over.
Addaan itan iti 71K a followers iti Facebook. Kaaduan a dagiti karinderia ken dagiti naiimas a paksiw, ataata wenno presko a kilawen, dinardaraan, dinakdakan, pinapaitan, empanada, tinuno a pusit ken kasta metten dagiti miki ti ramen dagiti video ni Charm. Adu metten dagiti agkiddaw a mai-feature-da, ket dagiti dadduma, datin a pangpanganan ni Charm. No dadduma met irekomendar dagiti gagayyem ken followers-na.
Kadua ni Charm iti TV-na ti kabsatna a lalaki (Richard Harry Ramos), ti kaingungotna (Master Jovanne Bryan M. Raquel), ken maysa a friend-na a babai (Niña Bernardino). Pasaray saan laeng nga iti karinderia wenno panganan ti pakapasamakan dagiti video ni Charm, mabalin met nga iti karayan wenno pagpipiknikan.
Adda metten dagiti video ni Charm a kas collaboration-na kadagiti dadduma pay a food tradition vloggers ti Ilokandia a kas iti Palanit is Life. Ti pay nakaay-ayat, isursurot metten ni Charm dagiti annakna (da Sebastian Carlos, 10; ken Hunter Elli, 4) kadagiti ar-aramidenna a food videos. Kuna ni Charm a napanunotna daytoy tapno umuneg met ti padasda iti nakayanakan a taraon.
“Nakaam-amak a malipatan dagiti ubbing ti kannawidan dagiti Ilokano maipanggep iti taraon isu nga ita pay itugtugotko ken iramramanko dagiti annakko kadagiti Ilokano food videos-ko,” kinuna ni Charm. “Adu ngaminen nga ubbing ti fastfood lattan ti ammoda a panganan iti ruar.”
Mabuya ti food vlog ni Charm iti link nga https://www.facebook.com/charmificationtv/.
Tubo ti Siudad ti Laoag ni Charm; isu ti inaudi iti uppat nga annak da Richard ken Imelda Ramos. Nagturpos iti Bachelor of Science in Nursing iti Divine Word College of Laoag ken agtrabtrabaho ita iti maysa a dialysis center iti San Nicolas, Ilocos Norte. Anak met da dati nga ALS Chief ti DepEd Region I Marianito Raquel ken mannurat ti Bannawag Elizabeth Madarang-Raquel ti kaingungotna a ni Bryan. --O
(Bannawag, Nob. 1-15, 2024)
