Pinasingkedan ti Korte Suprema (SC) idi kalman, Martes, Nobiembre 26, a nakaawatda iti disbarment complaint a naipila kontra ken ni Bise Presidente Sara Duterte iti komentona a mangkali iti bangkay ni dati a Presidente Ferdinand Marcos Sr. iti Libingan ng mga Bayani sa ibellengna iti West Philippine Sea.
Kabayatan ti press briefing kadagiti isyu a tamtamingen ti SC a kas full court, napagsaludsodan ni SC Spokesperson lawyer Camille Sue Mae L. Ting no adda naipila a disbarment complaint kontra iti Bise Presidente.
Insungbat ni Ting: “Agpayso nga adda pending case for disbarment kontra iti VP a naipila sumagmamano a tawenen ti napalabas idi mayor pay laeng iti Davao City.”
“Ket ita laeng a bulan (Nobiembre), nakaawat ti SC iti di nainaganan a reklamo mainaig kenkuana (VP) maipapan ken ni pimmusay a Presidente Ferdinand Marcos Sr.”
Presidente Marcos, addan iti Filipinas
Dakdakamaten la ketdi ti di nasao a reklamo ti pakaammo ni VP Duterte nangibagaanna a no agtultuloy ti political attacks kontra kenkuana manipud iti agdama nga administrasion, personal a kalienna ti bangkay ni dati a Presidente Marcos Sr. sa ibellengna iti West Philippine Sea.
Nailanad kadagiti naipablaak a report a kinuna ni Duterte daytoy idi napagsaludsodan no nalipatanen ni Presidente Bongbong Marcos a ti amana, dati a Presidente Duterte, ti nangipalubos iti pannakaitabon ni pimmusay a Marcos Sr. iti Libingan ng mga Bayani.
Dakdakamaten pay dagiti report ti sungbat ni VP Duterte: “Hindi ko alam. Pero isang beses, sinabihan ko talaga si Senador Imee (Marcos). Sabi ko sa kanya, kung hindi kayo tumigil, huhukain ko ‘yang tatay ninyo, itatapon ko siya sa West Philippine Sea.”
Idi napagsaludsodan no nagtignayen ti SC mainaig iti di nasao a reklamo, kinuna ni Ting: “Awan pay ti aksion ti SC iti agdama.” (Rey Panaligan/Manila Bulletin)
