NAPADASAM kadin nga inrekord dagiti ar-aramidem iti talonmo wenno kadagiti tarakenmo a dingo? Kas koma no kaano a nagbunubon, nagmula, nagabono, nagburaska, ken dadduma pay? Wenno kaano a pinabakunaam dagiti tarakenmo? Wenno kaano a gimmatangka iti kanenda, wenno no kaano a nagpaanakka iti baboy? No mano amin ti nagastom, ken no mano met ti naganansiam?
Ti panagrekord ti maysa kadagiti tulbek ti naballigi a panagtalon wenno panagtaraken kadagiti dingo. Maysa daytoy a wagas ti panangmonitor kadagiti aktibidad. Maaddaanka iti detaliado a listaan dagiti magasto kadagiti kasapulan, iti kasta, nalaklakanto laeng a makuentam no mano ti nagansiam; saan a daytay patpatangam laeng no mano ti simrek iti bolsam.
Babaen ti panagrekord, maammuan met dagiti napipintas nga estratehia a naaramidmo nga isu met ti mabalinmo manen a suroten kadagiti sumaruno nga aktibidadmo.
No addaanka iti detaliado a rekord, makita ken alisto a maadal ti panagprogreso dagiti ania man nga aramiden, panagtaraken man wenno panagmula kadagiti nateng, pagay, ken dadduma pay. Babaen ti rekord, adda pagibasaran iti sumaruno a desision, kasta met kadagiti banag a kasapulan a pasayaaten pay.
TULONG ITI MANNALON: Irekrekordmo Met Laeng Dagiti Ar-aramidem iti Talon?
Iti benneg ti agrikultura, napateg ti rekord keeping, kas kapateg ti panagpili iti mula ken dadduma pay nga ar-aramidentayo iti talon.
Narigat ti nakadepende iti memoria. Dakkel ti labitna a patpatangto laengen ti malagipmo a petsa ti panagmulam, ti panagpasuyotmo, ti panagganaganmo, no dimo isurat.
No Napintas ti Rekordtayo:
1. Al-alisto a maibaga wenno maammuantayo dagiti pagpigsaan wenno pagkapuyan iti panagtalon wenno panagtarakentayo.
2. No saan a patpatang ti rekordtayo, maammuantayo no nagpukawtayo wenno nagganansiatayo.
3. Makatulong iti napimpintas a pannakaimanehar dagiti pagtatalonan/pagtaraknan.
4. Alisto a maammuan no kaano a nagmula wenno nangrugitayo a nagtaraken, kdp.
5. Iti panagaramat iti agas, ammoyo no ania, kasano ti kaadu ken kaano ti panagpatomaryo.
6. No adda rekord, mabalin a mapagdasig dagiti baro a sistema ken kadawyan a sistema ti panagmula ken panagtaraken. Ania dagiti nagbalin nga epekto ti panagaramat iti napasayaat a sistema? Adda kadi naitulongna? Ngimmato kadi ti naganansia wenno napastrek? No saan, rumbeng kadi nga ituloy ti naso a sistema? Babaen ti rekord, nalaklaka a makaikeddengtayo iti umno a desision.
7. Tumulong dagiti rekord a mangipaneknek a ti maysa a banag ket mabalin nga ag-level-up. Kas koma no tallo ti pangganakan iti immuna, mabalin a nayonan no makita a dakkel ti maganansia. Kasta met ti panagmula. Kas koma no kamatis, mabalin nga iti bulan ti Hulio, ad-adu ti maganansia no agmulaka ti off-season a kamatis. Ipaneknek daytoy ti listaan dagiti naglakuan kasta met dagiti nagasto.
Tips iti Panagrekord
Adtoy ti sumagmamano a tips iti panagrekord:
1. Aramiden laeng a simple tapno alisto a masurotan.
2. Irekord a dagus. Ilanadmo ti petsa. Saan nga itungtungkua. Awan surok, awan kurangna.
3. Masapul a nasayaat ti pannakaurnosna.
4. Saan a patpatang. Kayatna a sawen, no mano ti nakaresibo, isu laeng ti mailista.
No agrekord, mabalin ti agaramat iti logbook wenno kuaderno; mabalin met nga ideretso iti kompiuter no adda la ketdi. --O
(Agyamankami ken ni Prof. Sheena Marie Joy Lidora, Faculty Member iti Agribusiness Department, College of Agriculture, Food and Sustainable Development (CAFSD) a nangibinglay kadagiti impormasion iti record keeping iti panagtalon. –MRG).
(Bannawag, Enero 1-15, 2024)
