Mabalin a maidarum ni Bise Presidente (BP) Sara Duterte iti panaglabsing iti Anti-Terror Act (ATA) gapu iti insawangna a nangontrata iti mangpapatay ken ni Presidente Ferdinand R. Marcos Jr. ken First Lady Liza Araneta- Marcos, kasta met ni House Speaker Martin Romualdez, segun iti Department of Justice (DOJ) itay Nobiembre 27.
Segun ken ni Undersecretary ti DOJ Jesse Andres, maibatay iti Section 4 ti Anti-Terror Act, maibilang a terorismo ti gandat a panangpapatay wenno nakaro a panangdangran maibusor iti asino man tao wenno mangitunda iti pagpeggadan ti biag maysa a tao, nangruna no ti panggep ket mangbutbuteng wenno mangpataud iti buteng.
Kinuna ni Andres a masinga dagiti trabaho ti Presidente gapu kadagiti serioso a pangta, isu a masapul a mataming a dagus daytoy.
Impaganetget pay ni Andres a ti pangta maibusor iti Presidente ket pakaseknan iti nailian a seguridad.
Iti sabali a bangir, impasigurado ni Sekretario ti DOJ Jesus Crispin Remulla iti publiko a saandanto pulos nga agsanud maibusor iti insurhensia wenno aniaman a kita ti kinaawan linteg ken agtalinaed a sititibker a mangsalaknib, saan laeng nga iti Chief Executive, no di ket ti entero a pagilian ti Filipinas.
Pannakaimbestigar ti napasamak iti Senado, imbilin ni Presidente Marcos
Kalpasan ti panagsao iti online ni BP Duterte idi Nobiembre 23, kinuna ni kinuna ni National Security Adviser Secretary Eduardo Año nga amin a pangta iti biag ni Presidente Marcos ket naan-anay a maimbestigaran ken “maibilang a pakaseknan iti national security.”
Itay Nobiembre 26, pormal a kiniddaw ti National Bureau of Investigation ken ni BP Duterte nga itedna ti biangna kadagiti agimbestigar mainaig kadagiti sinaona. (Benjamin Pulta/PNA//Lito Hilidon/Bannawag)
