KANGITINGITAN ti pandemia a COVID-19 idi 2020 idi mapanunot ni Bryan Ramoran Garcia ti Brgy. Casilian, Bacarra, Ilocos Norte, ti mangaramid iti video maipapan iti maysa a kararag a mangyadayo kadatayo iti peggad ti nasao a bayrus. Manipud iti daydi a kararag agingga kadagiti kontemporaneo a topikona ita, nagbalinen ni Bryan a maysa kadagiti teddek ti vlogging iti Ilokano.
Nupay nabayag metten a pampanunoten ni Kapitan Panaltaak wenno Pareng Boy, dagiti birngasna iti Facebook, ti agbalin a vlogger, saannna a natun-oyan ti panagbalinna a kasta agingga iti idadateng ti pandemia, idi saanen a makaruruar dagiti tattao ket maysamaysa nagbirok iti pakakumikomanna.
Daydi a video, nga immabot iti 200,000 a views kadagidi a panawen, ti nakagutigotan ni Bryan nga adda gayam masakbayanna iti vlogging. Pinasarunsonanna manen dayta iti maysa a video a kararag a mangyadayo koma iti pagilian iti damka ni Bagyo Ompong a dimmalapus iti Amianan a Luzon kadagidi a panawen.
Ditan a nagsasaruno dagiti content-na ngem napadasanna ti dinusa ti Facebook gapu iti panangusarna iti content a saanna a kabukbukodan. Gapu iti panagusarna iti paset ti video nga addan iti internet, sinuspenso ti Facebook ti account-na ket naisardeng ti panagsueldona manipud iti higante a social media company.
TULONG ITI MANNALON: Irekrekordmo Met Laeng Dagiti Ar-aramidem iti Talon?
Ni Bryan Ramoran Garcia (tengnga), Kapitan Panaltaak wenno Pareng Boy iti Facebook, ken kakaduana. (Ladawan manipud iti FB)
“Tapno maagasak ti nagbasolak, pinunasko amin dagiti immunan a video-k, sa binaliwak ti account-ko,” kinuna ni Bryan, agtawen itan iti 41 ken agindeg iti Sitio Taguipuro iti Casilian. “Nasurok a makatawen a nagsagabaak, nga uray an-anuek, uray ania a content ti aramidek, panag-video iti panagkalap, panagala iti ipon, pannangan kadagiti kankanen ni Ilokano, saanak latta a nakaungar.”
Adda pay dagidi panawen a nagbalin a content ni Bryan ti panangpaay-ayamna kadagiti tattao – kas koma iti pinnaspasan a panag-grocery, a bayadanna ti balor ti ma-grocery ti agay-ayam iti unos ti 30 a segundo.
“Adda pay dagidi panawen a ti content-ko ket panagpa-raffle, ket dagiti mangabak, mapremioan iti manok,” kinuna ni Bryan. Adu kano ti manokda kadagidi a tiempo. Adda pay dagiti papremiona a cell phone load.
Maup-upay kano idin ngem adda kano met laeng vlogger a nanginspirar kenkuana, a no agsardeng, admitirennan a naatiw iti daytoy a tay-ak.
Nagpatingga ti panaggawat ti karera ni Bryan a kas vlogger idi nasumokna nga aramaten ti padaya ni Ilokano a kas content. Babaen dayta a content, nadanon manen dagiti videos-na ti ginasgasut a ribu a views. Immuna a naglatak a video-na ti panagisupotna iti pito a plato ket pimmatit daytoy iti 700K a views. Manipud idin, saanen a magebgeban ni Bryan dagiti agimbitar kenkuana tapno mapan agaramid iti content kadagiti mapaspasamak a dayaan. Idi un-unana, iti Bacarra ken kabangibang nga ili laeng ti pagnaedan dagiti agayab; idi agangay, adu payen iti Cagayan ken Ilocos Sur.
Gagangay a mangrugi ti content maipapan iti daya iti panagipadamag ti maysa a kadua ni Bryan no sadino ti agpadaya. Ket mapandan nga agkakadua tapno i-video-da ti panagparti, panagluto, panagibunong kadagiti makan, panagpipila ken ti makakiki a paset ti panagpadaya – ti panagyawid kadagiti sagana.
Manipud iti padpadaya a kas content, immalatiw metten ni Bryan iti panangipakita no kasano ti panagarem ken panangasawa ni Ilokano, babaen ti panangyam-ammona ken ni Marlene Antonio Garcia, 41, ti baketna a patinayon a “darling” ti awagna. Ket nanaynayonan pay dagita a content maipapan kadagiti parikut, apa, pinnasugnod dagiti agassawa, agingga iti maipapan iti eleksion idi eleksion ti barangay.
Adda met dagiti nakakatkatawa a video nga inaramid da Pareng Boy (Bryan) ken Mareng Mirasol (birngas ni Marlene a baketna iti FB) maipapan iti mulada a marunggay. Pasaray pay adda met dagiti content a pangawisan ni Pareng Boy kadagiti kakaduana a vlogger.
Kas direktor dagiti video-na, ni Bryan ti mangpanunot kadagiti content ken isuna metten ti mangareglar kadagiti isao dagiti agbibiag. Makatulong metten ti inaunaan nga anakda ken Marlene a ni Christian James A. Garcia, 17. Isu ti agserserbi a kas videographer a pakausaran ti iPhone a selpon a nabakirda iti panag-vlog.
Da agassawa a Bryan (Pareng Boy) ken Marlene (Mareng Mirasol). (Ladawan manipud iti FB)
Kuna ni Bryan a no makaawis ti video iti 1M a views, mangted metten ni Meta iti 30 agingga iti 50 dollars kenkuana a kas creator. Maideposito daytoy kas doliar iti dollar account-na. Kinunana a dakdakkel idi ti bayad, ngem basbassit itan ti ibayad ni Meta wenno Facebook.
Kaaduan a mapan iti charity ti masapsapulan ni Bryan. Agingga idi Hulio itoy a tawen, kunana nga addan 600,000 a pisos a naitedda nga agassawa kadagiti agkasapulan para iti pagpaagasda ken 3,000 a paris a tsinelas a naibunongda. Adda iti Ilocos Norte ken Cagayan dagiti tultulonganda.
“Saan a para kadagiti nakapsut ti pakinakemna ti vlogging,” kinuna ni Bryan. Wen, ta adu kano latta dagiti basher a mangdadael iti maysa a vlogger.
Napalaus ti panagyaman ni Bryan kadagiti audience-na ta saanna kano a nadanon ti kinalatakna iti agdama no saan a gapu kadakuada. “Babaen met laeng kadakayo, umadu nga umadu dagiti matulongantayo,” kinunana.
Kadagiti mayat a maliwliwa kadagiti vlog ni Bryan Ramoran Garcia, alias Pareng Boy, Kapitan Panaltaak wenno ProbinsyanoAko, dagitoy man ti link-na: https://www.facebook.com/search/top?q=probinsyanoako ken https://www.facebook.com/imjustSimpleMan. –O
(Maysa a mannursuro, cartoonist ken pintor, agnaed ni Levi A. Bayudan ken ti pamiliana iti Fortuna, Marcos, Ilocos Norte. Agpapaay a kas Teacher III iti Marcos National High School.)
