TUNGGAL malem a sumangpetak iti balaymi, adda latta dagiti asok a sumabat kaniak. Maikkat man a dagus no kua ti bannogko iti nagmalem a kaaddak iti eskuela a kas mannursuro. Nangruna ket agpaubbada pay kasta unay kalawikiw ti ipusda.
Gapu met kadagitoy nga ipakpakitada kaniak, kunaek nga ipatpategdak met dagiti asok a kas iti panangipatpategko kadakuada.
Wen, agpayso a dinatay makasao ti aso iti lengguahetayo a tattao. Ngem adda dagiti pagilasinan wenno wagas tapno maipariknada nga ipatpategdatayo.
Umuna, naamo a mangmatmatmat kenka ti asom.
TULONG ITI MANNALON: Irekrekordmo Met Laeng Dagiti Ar-aramidem iti Talon?
Maikadua, no yasidegna kenka ti abalbalayna, kayatna a sawen, ipiarna ti banag a napateg kenkuana. Ken kayatna ti makiay-ayam kenka.
(Unsplash)
Maikatlo, no kayatna ti makikaidda kenka, kayatna a sawen, ibilangnaka a kabbalay.
Maikapat, no di agun-uni bayat ti panagpakadam, kayatna a sawen nga agtalek kenka nga agsublika met laeng a dagus.
Maikalima, no sipapakumbaba ti asom a mangmatmat kenka, ibagbagana a no mabalin la koma, agkadkaduakayo iti inoran-oras.
Maikanem, no minatmatannaka ti asom kalpasan ti pannanganna iti intedmo a kanenna, kayatna a sawen nga agyamyaman. Wenno saan, no dinilpatannaka.
Maikapito, no ilagidlagidna ti bagina kenka, ibilangnaka a napateg a gayyem. Adda pay dagiti aso nga agpasaklot wenno agpaubba.
Maikawalo, no malmaldayka wenno madandanaganka, agpaubba wenno umarakup kenka.
Maikasiam, paspasungadennaka no sumangpetka. Adda pay kasta unay a taultaulna. Adda met aglagtolagto. Adda pay agkinnikinni.
No bilang dimo makita dagitoy a pagilasinan iti asom, panawenen nga ipariknam ti panangipategmo kenkuana tapno isublina met kenka dayta a panagayat. –O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)
(Bannawag, Enero 1-15, 2023)
