Babaen ti panangaramat kadagiti fossilized wenno bimmato a sample ti takki ken sarua dagiti dinosaur iti Poland, naammuan dagiti sientista no kasano a dinominaran dagiti dinosaur ti lubong minilion a tawenen ti napalabas.
Saan a masigurado dagiti agsuksukisok no napasamak ti panagturay dagiti dinosaur iti las-ud ti 30 milion a tawen gapu iti gasat, kinalaing, klima, wenno dadduma pay a gapu. “Saan a kellaat a banag dayta a (napasamak),” kinuna ti maysa kadagiti mangad-adal a ni Martin Qvarnström manipud Uppsala University.
Ti baro a panagadal, a naipablaak idi Nob. 27 iti journal a Nature, nasukimat ti ginasut a takki ti dinosaur tapno maammuan no ania ti kankanen dagitoy a nabiag 200 a milion a tawenen ti napalabas.
Segun ken ni Qvarnström, uray ania lattan ti kanen dagiti immuna a dinosaur, manganda iti ania man a makita wenno mabaelanda a kanen kas koma kadagiti insekto, ikan, ken mula.
Kababaketan nga atap a billit iti lubong, nagitlog idiay Hawaii iti edadna a 74
Ti panagbaliw ti kasasaad ti klima, alisto a naadaptar dagiti dinosaur. Kas pagarigan, dagiti dinosaur a mangmangan iti mulmula, nanganda iti dadadakkel a klase ti mula ngem iti dadduma a dinosaur, isu a nalaklaka a nayaduda ti klase ti kankanenda idi timmaud dagiti baro nga species ti mula.
Gagangay nga adalen dagiti sientista dagiti nagkauna a rugit tapno maawatanda dagiti nabiag iti napalabas, kinuna ni Emma Dunne, maysa a paleobiologist iti University of Erlangen-Nuremberg. Ngem dagiti fossilized a takki, umasping kadagiti pedaso ti bato, ken saan a kanayon a masarakan dagitoy iti asideg dagiti fossil ti ayup a nangitakki kadagitoy — a mamagbalin a narikrikut kadagiti sientista a mangammo no sadino ti naggapuan dagitoy a takki.
Iti nasao a panagadal iti Poland, nasarakan dagiti sientista dagiti siksik ti ikan, pirsay ti insekto, tikap ti tultulang a nairamen kadagiti takki. ((Adithi Ramakrishnan/Associated Press))
