Iramanen ti Philippine Health Insurance Corporation (PhilHealth) ti dental services kadagiti healthcare benefit packages-da kalpasan nga inaprobaran daytoy ti Board of Directors ti PhilHealth.
Segun iti PhilHealth, dagiti kakasta a serbisio a nairaman iti landmark package ket ti mouth examination/oral screening, dental prophylaxis wenno panagdalus, ken fluoride varnish application.
Sakupenna pay dagiti fissure sealants, Class V procedures, emerhensia a panagpabunot iti ngipen, ken panagpakonsultar maipanggep iti ngipen.
"Masapul nga addaan iti oral health care ti universal health care, ken ti kasayaatan a wagas tapno agbalin a sustainable ken marikna dagiti amin a Filipino ket babaen ti primary care," kinuna ni Health Secretary Teodoro Herbosa.
Listaan dagiti nakapasa iti 2024 Philippine Bar Examination
Innayonna nga, "Inanamongan ti Board ti maysa a preventive oral health benefit a maited babaen dagiti dentista nga agtrabtrabaho kadagiti PhilHealth Konsulta package providers, ken kadagiti indibidual a dentista a maikkan iti referral manipud kadagiti Konsulta providers."
Iti babaen daytoy a health package, inaprobaran ti PhilHealth Board ti maximum payment a P1,000 iti tunggal tawen para iti tunggal pasiente a para met iti preventive oral health services.
Mabayadanda iti PhP300 iti umuna nga ibibisita para iti mouth examination/oral screening, oral prophylaxis (panagdalus), ken fluoride varnish application; sabali pay a P300 para iti maikadua nga ibibisita iti dentista (uppat a bulan manipud iti umuna nga ipapan iti dentista) para iti isu met laeng a serbisio. Ken sabali pay a P200 para iti tunggal ngipen (maximum a dua a ngipen) para iti pit and fissure sealant wenno Class V procedure.
Segun iti PhilHealth, maiparit ti co-payments para kadagiti public dentist, idinto a dagiti pribado a dentista ket mapalubosan iti maximum co-payment charge a P1,500 tunggal ipapan ti pasiente para iti mouth examination ken oral prophylaxis; P600 para iti pit ken fissure sealant wenno Class V procedure; ken P600 para iti emergency tooth extraction.
Naammuan a naigiddan ti pannakaanamong daytoy dental health services iti pannakipaset ti pagilian iti umuna a World Health Organization (WHO) Global Oral Health Meeting (GOHM) a naangay iti Bangkok, Thailand, manipud idi Nobiembre 26 a nagpatingga itoy nga aldaw, Nobiembre 29, 2024. (Mary Ann Santiago/Balita)
