CABANATUAN CITY, Nueva Ecija— Pitopulo ket lima (75) a karton ti naipuslit a sigarilio a mapattapatta nga agpateg iti 1.3 milion a pisos ti nakumpiskar dagiti polis iti maysa a checkpoint sadiay Zaragoza, Nueva Ecija idi Sabado, Nobiembre 30.
Kinuna ni Police Col. Ferdinand Germino, hepe ti polisia ti Nueva Ecija, a pinasardeng dagiti polis iti checkpoint ti maysa a van para iti routine check ken verification.
Linuktan ti 42 anios a drayber ti lugan ket naitangkarang kadakuada ti 20 a karton ti sigarilio a Modern Red, 25 a karton a Modern Blue, 20 a karton nga RGD, ken 10 a karton a Carnival.
Natiliw ti drayer iti panaglabsing iti Republic Act 8293 wenno Intellectual Property Code of the Philippines.
VP Sara, tinagibassitna ti impeachment complaint iti Kamara
Naipan ti suspek ken dagiti nakumpiskar a banag iti Zaragoza police station para iti umno a disposision.
Kinuna ni Geronimo a seriosoda a mangtaming iti panagipuslit iti sigarilio iti probinsia.
“Agserbi koma a daytoy a ballaag kadagiti amin nga aglaklako, agiwarwaras, ken agsigsigarilio iti peke. Mataming dagiti kaskastoy a di maiparbeng nga aramid ken panaglako kas mayalubog iti linteg,” kinuna ni Germino.
(Liezle Basa Iñigo/Manila Bulletin)
