LA TRINIDAD, Benguet – Pinatgan itay nabiit ti Commission on Elections Second Division ti petision a nangideklarar ken ni Adam Yap a kas nuisance candidate gapu iti kinakurang ti pudno a panggepna nga aktibo a makipaset iti proseso ti eleksion a kas kandidato ti Benguet iti Kongreso.

Kinuna ni Rep. Eric Go Yap, a nangipila iti petision, nga adda kinamalisioso ti panangipila daytoy kaap-apeliedona iti Certificate of Candidacy (COC)-na ta awan panggepna no di mangmulit iti dayaw ken mamagbalin a nakakatkatawa ti proseso ti eleksion, ken mangpataud iti pannakariro dagiti botante.

"Impilak ti petision tapno maideklarar ni Mr. Adam Yap a kas nuisance candidate gapu ta nakaawatak kadagiti report no ania nga agpayso ti  nangtignay kenkuana a nangipila iti kandidaturana ket agyamanak iti Comelec gapu iti pannakakitada iti merito ti petisionko," kinuna ni Representative Yap.

Kinuna ti Comelec a dagiti nuisance candidates ket isuda dagiti tattao a mangipila iti COC-da tapno pagbalinenda ti proseso ti eleksion a nakakatkatawa wenno awanan  reputasion wenno mangpataud iti pannakariro dagiti botante gapu iti panagpapada ti nagan dagiti nairehistro a kandidato wenno gapu iti dadduma pay a kasasaad ken awan ti napudno a panggep ti kandidato nga agkandidato.

Lokal

Kapitan ti barangay iti Isabela, pinaltoganna ti maysa a mannalon

Adam Yap

"Nakaawatak kadagiti report manipud kadagiti mapagtalkan a tattao a daytoy kano Adam Yap ket inasitgan ti dua a tao. Kinombinsirda nga ag-file iti kandidaturana para congressman nga addaan panggep a mangpataud iti pannakariro wenno pannakaulaw dagiti botante, ta agpadakami iti apeliedo ken isu ti umuna iti balota. Gapu ta ‘shading’ itan ti panagbotos, awan ti mai-credit kaniak no isu ti maibotos gapu iti pannakariro ti botante,” innayon ni Representative Yap.

Kuna ti Comelec a ni Adam Yap ket kaap-apeliedona ni Representative  Yap ket dakkel ti tiansana a mabalin nga agbiddut dagiti botante iti panagbotosda ta mabalin nga ipatoda a ti ibotbotosda ket ni Representative Yap ngem ni met gayam Adam Yap. No kastoy ti mapasamak, kinuna ti Comelec a saan laeng a mamulitan ti integridad ti eleksion no di pay ket maksayan ti panagtalek ti publiko iti sistema ti eleksion.  (Zaldy Comanda/ Manila Bulletin)