CAMP MARCELO A. ADDURU, Tuguegarao City, Cagayan – Aggatad iti dandani PhP8-milion nga ilegal a troso ti nakompiskar dagiti polis iti Region 2 wenno Cagayan Valley manipud idi Enero agingga iti Nobiembre ita a tawen.
Mainaig itoy, kinuna ni Police Brig. Gen. Antonio P. Marallag Jr., hepe ti Police Regional Office 2, a paingetenna ti kampania kontra iti illegal logging iti rehion babaen ti pannakitinnulong ti Department of Environment and Natural Resources.
“Kasapulan a paingetentayo ti operasion kontra illegal logging babaen ti pannakitinnulong ti DENR iti Cagayan Valley tapno ad-adda a masalakniban dagiti nabati a virgin forest areas iti rehion,” kinuna ni Marallag, a nanginayon a dakkel ti naaramidan ti illegal logging iti pannakapaspasamak dagiti layus iti rehion.
Ni Police Brig. Gen. Antonio P. Marallag Jr., hepe ti Police Regional Office 2.
Puor iti kabambantayan ti Carasi, 'under control,' kuna ti BFP-Ilocos Norte
Nakakompiskar dagiti pannakabagi ti linteg iti ilegal a troso nga agpateg iti PhP3.7-milion iti Nueva Vizcaya, PhP2.2-milion iti Cagayan, PhP1.3-milion iti Isabela, PhP15,500 iti Batanes, PhP359,739 iti Quirino, ken PhP20,595 iti Santiago City.
Sangagasut limapulo ket walo a kaso ti illegal logging ti nairekord ken 348 nga anti-illegal logging operations ti naisayangkat. Sangagasut uppat a pulo ket maysa nga illegal logging cases met ti naipila iti korte ken 226 a maatap nga illegal loggers ti naaresto.
Indonar ti DENR-Region 2 ti sumagmamano kadagitoy nakompiskar a troso kadagiti biktima ti bagyo iti Batanes ken Cagayan para iti pannakabangon manen ken pannakatarimaan dagiti nadadael a balay ken pagadalan. (Freddie Lazaro/ Manila Bulletin)
