ADU ti agdamdamag kaniak no kasano nga isursurok dagiti asok. Makitada ngamin a maminsan wenno mamindua laeng a paguniak ida, agtalnadan. Denggen ken awatenda dagiti ibagak.
Kuna dagiti am-ammok a medio marigatanda a mangisuro kadagiti asoda ta nasubegda kano. Kastoy man ti ar-aramidek kadagiti asok.
Saanak a trainor iti aso, ngem ketdi maysaak a dog lover. Agtartarakenak iti aso ta isuda ti stress reliver-ko. No agtarakenak iti aso, kaykayatko nga uken pay laeng nga alaek iti sidongko. Nalaklaka ngamin nga isuro ti uken. Anus laeng ti kasapulan. Saan a mabalin a bugkawan ta aglalo a dina denggen ti kayat nga isuro. Maipasagepsep pay iti utekna a nauyong ti amona.
Kangrunaan nga umuna nga isurom iti aso ti umno a pagrugitanna. Ti ar-aramidek, patakkiek daytoy kalpasan a makapangan. No nakapanganen, kasaritam a rummuar ket iturongmo iti pagrugrugitanna. Dimo pampanawan; yuraymo agingga a malpas a tumakki. Kalpasanna, akupen ti rugitna ket ibellengmo iti naipasadia a pagibellengan. Nasaysayaat pay nga adda ited a gunggona kalpasan a maaramidna ti kayat nga isuro. Mabalin a pasakmolan iti kaay-ayoda a makan.
TULONG ITI MANNALON: Ammom Met Laeng ti Umno a Panagabono?
Uppat dagiti Shih Tzu nga asok ket pasaray maturogda pay ditoy kuartok. Adda naipasadia a pagturoganda iti paset ti kuartok. Iti ala singko iti bigat, isudan a mismo ti mangriing kaniak. Taulandak wenno gaw-agaw-atendan ti katrek. Alistoakto metten a bumangon ta orasen ti panagisboda. Rinuamko ngamin ida nga iti ala singko iti bigat, masapul a rummuardan tapno umisboda. Sumrekdanto lattan iti balkon apaman a nakaisboda wenno nakarugitda (ta nasursuruak ida idin iti ukenda pay laeng). Iti met agmalmalem a kaaddada iti uneg ti pagtaenganmi, yadayo ken iruarda ti isboda a saan ket a ditoy uneg ti balay ti pagisbuanda. Adda naisangrat a pagisbuanda iti ruar ti balaymi.
Idi damo, marigatanak a mangisuro kadakuada. Ngem inan-anusak. Masapul a kasaritak ida, iturongko ida iti naisangrat a pagisbuanda wenno pagrugitanda. Ipapaangotko kadakuada ti karton nga adda daratna wenno ‘tay plastic basin a nairanta a pagisbuan ti aso. Bambantayak ida ken ur-urayek a makaisboda ken makatakkida. Nagtuoken, kunkunak idi damo, ngem inan-anusak tapno saanakto a marigatan nga agpunas iti isboda ken agakup iti rugitda iti uneg ti balay inton dadakkeldan. Ket agpayso, saankon a problema ti agpunas iti isboda ken agakup iti rugitda ditoy uneg ti pagtaenganmi.
Iti met aldaw ti Sabado, ammodan a digosek ida. Idi damo, kamkamatek ida. Ti la adda a paglemlemmenganda. Makapungtotak a makakatawa iti kasta a galadda idi damo. Ngem idi manaynay, kasaritak laeng ida a masapul nga agdigosdan ta inkami agpasiar idiay parke, mayatda metten. No saan, adda itedko kadakuada a ngatingatenda a dog food. No imbagak dagitoy, masapul a tungpalek ti karik tapno saanda nga agbalin a nasubeg. Iti tunggal panagtungpalda, ikkak ida iti gunggona. Babaen daytoy, tungpalenda dagiti bilinko. --O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)
(Bannawag, Marso 1-15, 2023)
