Impaganetget ni Senate President Francis “Chiz” Escudero ita nga aldaw, Disiembre 3 ti kiddawna kadagiti kakaduana iti Senado a liklikanda ti mangted iti komento wenno agsao mainaig iti kaso nga impeachment maibusor ken ni Bise Presidente Sara Duterte.
Impalagip ni Escudero kadagiti Senador a ti pannakaidatag ti impeachment complaint iti Kamara ti pangrugian ti proseso a nailanad iti Konstitusion tapno masinunuo ti panagsungbat kadagiti kangatuan nga opisial ti gobierno iti pagilian.
Kinuna ni Escudero a ti Senado ti agpaayto a kas pangukoman wenno korte, ket ania man a banag a pakakitaaan iti panangidumduma wenno naitudingen a panangukom, saan laeng a mangdadael iti kinatarnaw ti impeachment trial, no di ket agraman iti panagtalek ti publiko iti Senado kas maysa nga institusion.
Segun ken ni Escudero, nupay maysa a politikal nga aramid ti impeachment, masapul latta a makita kadagiti amin a Senador ti awan panangidumdumada. (Hannah L. Torregoza/Manila Bulletin//Lito Hilidon/Bannawag)
