Binabalaw ti PDP-Laban a paksion ni Senate Minority Leader Aquilino "Koko" Pimentel ti panangallukoy ni dati a presidente Rodrigo Duterte kadagiti kakaduana a mapanda iti EDSA Shrine.
Daytoy ti naipaskil iti opisial a Facebook Page dagiti paksion ni Senador Pimentel itay Dis. 2, kas sungbat iti impaskil ti bunggoy ni Duterte a mangaw-awag kadagiti pasurotna a bumusor iti administrasion ni Presidente Marcos.
Kinondenar da Pimentel ken Presidente ti Partido Manny Pacquiao ti nadarasudos nga ar-aramid ken negatibo a sasao ti managimbubukodan a paksion a siuulbod nga agkunkuna a mangibagi iti politikal a partidoda a PDP-Laban.
Kinuna ti bunggoy ni Pimentel a ti panagayab iti pannakariribuk ken ti di umisu a panangusar ti paksion ni Duterte iti nagan ti partido para kadagiti managimbubukodan a napolitikaan a tignay ket pananglabsing kadagiti prinsipio a nakaibangonan ti PDP-Laban, nga isu ti hustisia, kappia, ken ti panagturay ti linteg.
Mayawiden ti bangkay ti napapatay a Filipina iti Slovenia, segun iti DFA
Impaganetget ti grupo ni Pimentel a sititibker ti PDP-Laban a sumursurot iti Konstitusion, panagturay ti linteg, ken ti demokratiko a nabotosan a gobierno. Innayonda nga umdasen dagiti karit a sagsagabaen ti Filipinas, ket ti maudi a kasapulan ti pagilian ket ti panagsisina ken saan a kinatalged iti ima dagiti tao a mangipangpangruna iti bukodda nga interes, ngem iti pagimbagan dagiti padada a Filipino.
Awan pay ti naisao ni Senador Robin Padilla a Presidente ti PDP-Laban a paksion ni Duterte maipapan itoy. (Dhel Nazario/Manila Bulletin//Lito Hilidon/Bannawag)
