Nasentensiaan iti kaso a mainaig iti human trafficking ti 13 a Filipina nga adda iti Cambodia gapu iti panagpaayda a surrogate wenno mangisikog iti maladaga a nairanta a mailako kadagiti ganggannaet.
Uppat a tawen a pannakaibalud ti naipaulog a sentensia tunggal maysa kadagiti Filipina a natakuatan a nangilako wenno naggatang iti maladaga tapno maipan iti sabali a pagilian, segun iti Kandal Provincial Court itay Lunes, Dis. 2.
Naibalud dagiti Filipina iti ospital ti polisia iti ruar ti Phnom Penh a kabesera ti Cambodia, ket kinuna dagiti autoridad a maibaluddanto inton makapagpasngayda.
Idi Septiembre, natiliw dagiti babbai nga agpapaay a surrogate iti Kandal, a buklen ti uppat a Vietnamese ken 20 a Filipina.
Mayawiden ti bangkay ti napapatay a Filipina iti Slovenia, segun iti DFA
Naidarumda iti Oktubre, ngem saanda latta a naammuan no asino ti mangidadaulo iti grupo.
Napagtalaw ti 11 kadagiti babbai a saan a masikog, ket naidarum dagiti 13 a Filipina maibatay iti Suppression of Human Trafficking and Sexual Exploitation. Napabaro daytoy a linteg idi 2016 a nangiparit ti commercial surrogacy kalpasan a nagbalin ti Cambodia a nalatak a papanan dagiti ganggannaet nga agbirbirok kadagiti babbai a mangipasngay kadagiti annakda.
Kinuna ti panakangiwat ti korte a ni So Sarin a mabalin pay nga agapelar dagiti Filipina, ngem saanna nga imbaga no mano pay ti masikog wenno no ania ti mapasamak kadagiti maladaga kalpasan a mayanakda. (Associated Press/Manila Bulletin//Lito Hilidon/Bannawag)
