Nangrugi manen ti risiris iti Bajo de Masinloc (Scarborough wenno Panatag Shoal) kalpasan ti maipagarup a panangipaturong iti water cannon ken panangdungpar ti bapor ti China iti bapor ti Filipinas nga agpatpatrulia iti West Philippine Sea (WPS) ita nga aldaw, Dis. 4.
Nangisayangkat ti Philippine Coast Guard (PCG) ken Bureau of Fisheries and Aquatic Resources (BFAR) iti gagangay a panagpatrulia iti igid ti baybay tapno masuportaran dagiti mangngalap a Filipino idi nasagrapda ti agresibo a tignay ti China Coast Guard (CCG) ken People’s Liberation Army (PLA) Navy, segun ken ni Commodore Jay Tarriela, panakangiwat ti PCG iti WPS.
Kinuna ni Tarriela a tallo a bapor ti CCG nga addaan iti numero a "5303,” “3302”, ken "3104” ken ti bapor ti PLA Navy nga addaan iti numero a “500” ken “571” ti nagkaykaysa a nangipaturong iti water cannon iti kadagiti navigational antenna ti bapor ti PCG ken BFAR itay 6:30 ti agsapa.
Kinuna ni Tarriela a ginagara ti bapor a CCG 3302 a dinungpar ti kannawan a paset ti BRP Datu Pagbuaya, sa pinaturonganna manen ida iti water cannon.
Mayawiden ti bangkay ti napapatay a Filipina iti Slovenia, segun iti DFA
Binangenan, sinurot, ken napeggad a panangmaniobra ti inaramid dagiti bapor ti PLA Navy a 500 ken CCG 503 ti BRP Teresa Magbanua a bapor ti Filipinas; idinto a napeggad panangmaniobra met ti inaramid ti CCG 3104 iti BRP Cabra.
Adda met water cannon dagiti bapor ti PCG ngem kinuna ni Coast Guard Commandant Admiral Ronnie Gil Gavan nga usarenda laeng daytoy a pangispal iti biag iti baybay, kas iti panangsebseb iti apuy, saan a pangdangran iti tao. (Martin Sadongdong/Manila Bulletin//Lito Hilidon/Bannawag)
