Indagadag ni Diputado ti AGRI Party-list Wilbert T. Lee iti Department of Health (DOH) ken Philippine Health Insurance Corporation (PhilHealth) nga ibaklayda koma dagiti masapul a bayadan dagiti nakurapay a pasiente iti pribado wenno para iti publiko nga ospital, tapno saan a maitantan ti pannakaagasda.
Iti panangipilana iti House Resolution (HR) No. 2104, impaganetget ni Lee ti pateg ti epektibo a pannakaipatungpal iti Republic Act (RA) No. 11223 wenno ti “Universal Health Care Act,” a mangmandar kadagiti ahensia nga ipatungpalda ti komprehensibo a serbisio para iti salun-at dagiti amin a Filipino.
Kinuna ni Lee a garantiaan ti UHC Act, a nagbalin a linteg idi 2019, a maikkan ti isu amin a Filipino iti komprehensibo wenno kompleto a serbisio medikal, agraman outpatient ken specialty care. Ngem sumagmamano a tawenen ti limmabas, parikut latta dagiti Filipino, nangruna dagiti marigrigat, ti nakurang a serbisio ti ospital.
Impaganetget ni Lee a masapul a tamingen ti DOH ken PhilHealth ti narikut a rekititos iti administratibo ken dokumento a kasapulan kadagiti mangala iti serbiso, nga isu ti kangrunaan a makatubeng kadagiti ospital ken pasiente, nangruna dagiti marigrigat a nakurang iti pannakaammo, pamay-an wenno suporta a mangipagna iti narikut a proseso.
Mayawiden ti bangkay ti napapatay a Filipina iti Slovenia, segun iti DFA
Kinuna ni Lee a pagbalinen koma a simple, napardas ken nalaka dagiti rekititos kadagiti ospital ken pasiente, tapno mapalag-an dagiti bakbaklayen ti pasiente ken ti pamiliada nga agparparikut iti salun-atda. (Ellson Quismorio/Manila Bulletin//Lito Hilidon/Bannawag)
