LAOAG CITY, Ilocos Norte – Tingitingen ti Provincial Disaster Risk Reduction and Management Offices ti Ilocos Norte ken Ilocos Sur dagiti posible a nadadael a pasdek gapu iti magnitude-5.7 a ginggined a napasamak itay bigat, Mierkoles, Dis. 4.
Kinuna ni Ilocos Norte PDRRMO chief Marcel Tabije a mangisayangkat iti building assessment dagiti opisina ti inhenieria ti gobierno probinsial ken lokal.
“Awan pay met ti naawatmi a report maipapan kadagiti nadadael gapu iti ginggined. Nupay kasta, nainget a sukimatenmi amin a pasdek iti entero a probinsia,” kinuna ni Tabije.
Innayonna nga awan ti napasamak a tsunami gapu iti ginggined.
Kapitan ti barangay iti Isabela, pinaltoganna ti maysa a mannalon
Kinuna met ni Ilocos Sur PDRRMO chief Rhon Arquelada nga awan pay ti naawatda a damage report.
“Iti agdama, suksukimatenmi amin a pasdek ditoy probinsia tapno maammuan no nadadael dagitoy nga estruktura gapu iti ginggined,” kinuna ni Arquelada.
Dinayyeg ti ginggined iti Ilocos Norte iti 5:58 iti bigat, ken naitudo ti episentrona 4 a kilometro iti abagatan a laud ti Bangui, Ilocos Norte. (Freddie Lazaro/ Manila Bulletin)
