KAYATMO ti agaramid iti Carbonized Rice Hull (CRH) wenno inuring a taep ngem awananka iti carbonizer? Mabalinmo ti agaramid iti CRH nga uray awan ti carbonizer-mo. Ngem napimpintas pay no mangaramidka iti bukodmo a carbonizer.
Maibatay daytoy iti padas ni Lyndon Madrid ti Dingras, Ilocos Norte nga agar-aramid iti CRH (Ladawan 1) ken nakapanekneken iti kinasayaat ti CRH a mangpapintas iti kalidad ti daga a pagmulmulaanna.
Kunana nga awan met ti ar-aramatenna a carbonizer idi. Bumulbulod laeng iti kaarrubana. Ngem gapu iti reggetna nga agaramid iti CRH, inkalikagumna ti nagaramid iti bukodna a carbonizer (Ladawan 2). Kas nadakamatna, nangrugi ti reggetna nga agaramid iti CRH kalpasan ti panagatendarna iti panagsanay (training) nga insayangkat ti PhilRice ken iti panagenrolna iti Eskuela iti Tangatang wenno School-on-the-Air (SOA) Program ti MMSU, Siudad ti Batac.
No damagem ti rukod ti simboriona ken ti kasla pagaronanna a lata, kunana nga agdepende iti kayat wenno kasapulan a kadakkel. No adu ti aramiden a CRH, kayatna a sawen, mabalin nga idakdakkel ti aramiden. Basta siguraduen a makompleto dagiti pasetna: adda pagaronanna nga adda abut-abutna, ken adda simboriona.
TULONG ITI MANNALON: Ammom Met Laeng ti Umno a Panagabono?
Ti pagsayaatanna no adda bukodmo a carbonizer, uray ania nga oras, makaaramidka iti CRH, kas kuna ni Lyndon. Iti biangna, masapul nga addaan latta iti CRH ta kasapulan daytoy no agbunubon iti kamatis wenno ania pay a klase ti natnateng. Kinaagpaysuanna, addada dagiti agpabpabunubon ken ni Lyndon. Di kad’ isu pay a nayon a pamastrekanna.
Padasenyo man met ti agaramid iti bukodyo a carbonizer. No kabaelan ni Lyndon, kabaelanyo met. –O
(Bannawag, Abril 16-30, 2023)
