Mangipasdek ti Department of Agriculture (DA) kadagiti Kadiwa store kadagiti estasion ti Metro Rail Transit (MRT) ken Light Rail Transit (LRT) iti Metro Manila tapno ad-adu pay ti pakagatangan dagiti Filipino a consumer iti nalaklaka ti presiona a bagas,
Segun ken ni DA Assistant Secretary Genevieve Guevarra, mairaman dagiti estasion ti MRT ken LRT kadagiti lugar a plano a pakaipasdekan ti ad-adu pay a Kadiwa store a pakaikabilan dagiti kiosko a pakailakuan ti sag-PhP40 kada kilo a bagas.
Kinuna ni Guevarra a nakalukat dagiti Kadiwa store kadagiti estasion ti LRT ken MRT manipud alas otso iti bigat agingga iti alas singko iti malem.
“Ti panggep daytoy, tapno mangipaay iti nababbaba ti presiona a bagas a kabaelan ti kaaduan a consumer ken tapno makatulong a manglapped iti nangato a retail a presio ti bagas,” kinuna ni Guevarra, mangidadaulo iti programa ti Kadiwa.
Mayawiden ti bangkay ti napapatay a Filipina iti Slovenia, segun iti DFA
Dati a PhP45 kada kilo, naibaba itay nabiit iti PhP43 ti presio ti bagas a mailaklako iti babaen ti programa a Rice-for-All.
Kinuna ni Guevarra a maibaba pay ti presio a mangrugi ita a Huebes, Nobiembre 5, iti PhP40 kada kilo kas paset ti panangprotektar kadagiti consumer manipud iti inflation.
Malaksid kadagiti estasion ti MRT ken LRT, kinuna ni Guevarra a maipasdek pay dagiti Kadiwa store kadagiti kangrunaan a merkado publiko iti Metro Manila a pakairamanan ti Kamuning Market, Malabon Central Market, New Las Piñas City Public Market, Pasay City Public Market, Balintawak Market, Cartimar Market, Pateros Grace Marketplace, Maypajo Public Market, ken Paco Market. (Aaron Recuenco/MB)
