Impetteng ti dua a senador itay Mierkoles, Dis. 4, a rumbeng nga ammuen ti Bureau of Immigration (BI) iti kabiitan a panawen no siasino ti timmulong iti dati a panakangiwat ti presidente a ni Harry Roque a naglibas iti pagilian a di naam-ammuan.
Daytoy ti kiniddaw ni Sen. Risa Hontiveros, daulo ti Senate Committee on Women, Children, Family Relations and Gender Equality, a mangim-imbestigar kadagiti mainaig-POGO a krimen, kalpasan a naipakaammo a napan ni Roque, ken ni Mylah a kaingungotna, iti embahada ti Filipinas iti Abu Dhabi idi Nob. 29 tapno agipilada iti couter affidavit mainaig iti kasona a human trafficking.
Imbutaktak daytoy ti Department of Foreign Affairs (DFA) kalpasan ti kinuna ti BI nga ilegal a rimmuar ni Roque iti pagilian.
Segun iti DFA, adda imparang dagiti agassawa a balido a pasaporte ken legal nga agnanaedda iti United Arab Emirates (UAE).
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Kinuna ni Hontiveros nga adu ti masapul nga ipalawag ti BI, agraman ti panaglibas idi ni Guo Hua Ping a napan iti Indonesia, ta awan pay sungbatda maipapan iti daytoy.
Kinuna ni Hontiveros a parparigaten ti Immigration dagiti ordinario a Filipino a rummuar iti pagilian, ngem naglaka met a mapalusposan dagiti pugante.
Segun ken ni Sen. Sherwin Gatchalian, nalawag a ti BI ti ahensia a kakapsutan no maipapan iti panangpalusposda kadagiti di mapagtalkan a personalidad a pumanaw iti pagilian.
Impetteng ni Gatchalian a nupay awan ti pormal a reklamo maibusor ken ni Roque ken awan ti hold departure order, nairaman ni Roque iti lookout bulletin gapu ta adda contempt order ken warrant of arrest nga impaulog ti Kamara, ket umdas a mangtignay iti panangkontrol iti pagserkan ken pagruaran. Ngem nakalibas met latta ni Roque.
Kinuna ni Gatchalian a dakkel ti nagkurangan ti BI no maipapan iti panagbantay iti beddeng, ket masapul a tingitingenda daytoy. (Hannah L. Torregoza/Manila Bulletin//Lito Hilidon/Bannawag)
