NABAYAGEN nga agtartarakenak iti aso, aspin man wenno toy dog. Kas gagangay, adda latta dagiti saan a napintas nga ugali dagiti aso a matarakenko. Ngem saan a dayta ti tubeng tapno isardengko ti agtaraken iti aso. Ketdi, inad-adalko no kasano a maisurok ida.
Kaaduanna nga asok ket agkinnitda kadagiti tsinelas, sapatos wenno ania ditan. Idi nabiitak pay nga agtartaraken iti aso, bautbautek ida. Ibautko iti ngiwatda ti tsinelas a kas pangdusak kadakuada. Ngem dida met latta maikkat ti kasta nga ugalida. Isu a ti namay-ak idi, impaknikon dagiti tsinelas ken sapatosko. ‘Tay saandan a magaw-at.
Ti dakesna, ‘tayto metten tsinelas wenno sapatos ti sangailik ti kinnitenda. Gapu iti daytoy, inggatangak dagiti asok iti plastic teether. Ngem saan a narisut ti problemak. Kaskasdi nga agkinnitda latta. Saanen a mabilang no mano a plastic teether, tsinelas ken sapatos ti naperdida.
Agingga iti maysa nga aldaw nga isasarungkar ti beterinario ditoy balay. Naibagak kenkuana ti problemak. Kunana a no agliman a bulan ti uken, mangrugi metten nga agkinnit iti uray ania ditan. Kasla ubing met a no mangrugin nga agpatubo iti ngipen, uray la nga iridisna a kinniten ti suso ti nanangna wenno ti mamadorna.
TULONG ITI MANNALON: Ammom Met Laeng ti Umno a Panagabono?
Kasta kano met ti uken. No mangrugi metten nga agtubo dagiti permanent teeth dayoy, agkinnit metten. Saanako kano agus-usar iti plastic teether ta ad-adda laeng a masursuruan ti uken nga agkinnit.
Ket ti imbalakadna? Gumatangak iti tulang (ballawas) ti baka. Lutuek ti tulang sa warakiwakak bassit iti asin. Sa inton maluto bassiten, dawadawek ken ipabaawko. Inton nabaawanen ti tulang ti baka, itedkon kadagiti tarakenko nga aso. Masapul a saggagaysada tapno saanda nga agaangat.
Agpayso. Gapu ta addan pakakumikomandan a tulang, didan masango ti agkinnit iti tsinelas wenno sapatos. Ngamin, nabangbanglo met ti tulang. –O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)
(Bannawag, Abril 16-30, 2023)
