Kalpasan ti uppat a tawen, nagitlog manen ti maibilang ng agdam a katataengan nga atap a billit iti lubong, iti edad daytoy a 74, segun iti Pacific Region ti U.S. Fish & Wildlife Service.
Nagsubli ti Laysan albatross a napanaganan iti Wisdom iti Midway Atoll National Wildlife Refuge iti amianan a laud a pingir ti Hawaiian Archipelago ket inyitlogna ti pattapattaen dagiti eksperto a maika-60 nga itlogna.
Sipud 2006, agsubsubli da Wisdom ken ti asawana a ni Akeakamai iti nasao nga atoll iti Pacific Ocean tapno agitlog ken agukop. Tungpal biag ti panagkadkadua kas agassawa dagiti Laysan albatross ket agitlogda iti maysa maminsan iti kada tawen. Ngem sumagmamano a tawenen a saan a nakita dagiti wildlife official ni Akeakamai ket nangrugin a nakilangen ni Wisdom iti sabali a kalakian idi nagsubli daytoy itay lawasna.
Kinuna ni Jonathan Plissner, supervisory wildlife biologist iti Midway Atoll National Wildlife Refuge, a dakkel ti namnamada nga agpessa ti kaudian nga itlog ni Wisdom. Iti kada tawen, minilion a billit ti baybay, a pakairamanan dagiti albatros, ti agsubsubli iti atoll tapno agumok, agitlog, ken taraknenda dagiti sibongda.
<i>Vigilante star... for all seasons: </i>Maysa a panangrebiu iti 'Uninvited'
Agsinnublat ti ina ken ama nga albatross a mangukop iti itlog iti uneg ti agarup pito a bulan. Lima agingga innem a bulan kalpasan a mapessaan, agtayaben dagiti sibong nga albatross nga agpabaybay. Busbosen dagiti albatross ti kaaduan a paset ti biagda nga agtaytayab iti rabaw ti taaw ken mangmangan iti pusit ken bugi ti ikan.
Idi 1956 a napulserasan ni Wisdom a kas nataengan (adult) ket addan aganay a 30 a sibongna a tinatarakenna.
Gagangay nga agpaut ti biag ti maysa a Laysan albatross iti 68 a tawen, segun iti National Oceanic and Atmospheric Administration. (HALLIE GOLDEN/Associated Press)
