Pinirmaan ni Presidente Ferdinand Marcos Jr. ti Ligtas Pinoy Centers Act ken ti Student Loan Payment Moratorium During Disasters and Emergencies Act ita nga aldaw, Disiembre 6.
Panggep dagitoy a linteg a tulongan dagiti pamilia ken estudiante a naapektaran ti didigra.
Ti Republic Act (RA) 12076 wenno ti Ligtas Pinoy Centers Act ti mangipasdek iti permanente nga evacuation center iti entero a pagilian, a nadisenio a makaandur iti bagyo nga aginggat' 300 kilometro tunggal oras ti kapigsana, ken panagdayyeg nga agingga iti magnitude 8.0 ti kapigsana.
Maaddaan dagitoy a pagbakuitan iti pagturogan, pagpaagasan, sanitation facilities, ken mangipaay iti lugar para kadagiti taraken, ket maipangpangruna dagiti lugar nga asideg iti didigra.
Mayawiden ti bangkay ti napapatay a Filipina iti Slovenia, segun iti DFA
Ti RA 12077 wenno ti Student Loan Payment Moratorium During Disasters and Emergencies Act ti mangipaay iti pinansial a tulong kadagiti estudiante kadagiti lugar a nangideklarar iti state of calamity, a mangipalubos iti pannakaitantan ti panagbayad iti utang para iti higher-education ken panagsanay iti technical-vocational a programa, bayat ken kalpasan ti emerhensia, nga awan ti ania man a penalty wenno interes.
Dinagadag ni PBBM dagiti maseknan nga ahensia ti gobierno kas iti Department of Public Works and Highways (DPWH) tapno masigurado ti naintiempuan a pannakaipatakder dagiti pagbakuitan, agraman ti Commission on Higher Education (CHED) ken ti Technical Education and Skills Development Authority (TESDA) nga ipaayda koma amin a kasapulan a tulong dagiti marigrigat nga estudiante tapno saan a masinga ti panagadalda iti tiempo ti didigra. (Betheena Unite/Manila Bulletin//Lito Hilidon/Bannawag)
