Mapadpadaanan iti Kamara no kaano a yallatiw ni Secretary General Reginald Velasco iti opisina ti House Speaker dagiti dua nga impeachment complaint kontra ken ni Bise Presidente Sara Duterte.
Ngem saan pay aggunggunay ni Velasco ta adda report nga umadanin ti pannakaidatag ti maikatlo nga impeachment complaint kontra iti Bise Presidente.
Idi Lunes, Dis. 3, impila dagiti nadumaduma a grupo ti civil society nga indauluan ni dati a senadora Leila de Lima ti umuna nga impeachment complaint kontra ken ni BP Duterte. Iti sumuno nga aldaw, impila met dagiti progresibo a grupo ti maikadua nga impeachment complaint kontra iti Bise Presidente.
Kinuna ni Velasco a saanda pay nga inyawat ken ni House Speaker Martin Romualdez dagiti impeachment complaint ta adda pay ur-urayenda a maidatag.
Mayawiden ti bangkay ti napapatay a Filipina iti Slovenia, segun iti DFA
Ngem awan met ti nagipila iti Kamara itay Dis. 5, idinto a nakaserra ti opisinada manipud Biernes agingga Domingo. Kayatna a sawen, inton Lunes (Dis. 9) pay laeng a mabalin ti agipila.
Kabayatanna, kinuna ni Velasco nga ad-adalen ti Kamara dagiti dua nga impeachment complaint, no adda kurang wenno na-verify met laeng dagitoy.
Impakaammo ni Velasco nga adda immasideg ken nakisarita kenkuana a diputado maipapan ti panangidatagda met iti impeachment complaint, isu nga ur-urayenda daytoy, tapno mamimpinsan a mayawat iti House Speaker.
Ngem inlawlawag ni Velasco a no awanen ti agipila, yawatnan dagiti impeachment complaint inton umay a lawas.
Maangay ti maudi a sesion ti Kamara ken Senado iti daytoy a tawen inton Dis. 18. (Ellson Quismorio/Manila Bulletin//Lito Hilidon/Bannawag)
