Naimas a pangrabii, pakdaar ti panangsuportar ken ni Presidente Marcos, ken "panagsasarita" dagiti diputado.
Dagitoy ti napasamak iti Christmas fellowship a naangay idi rabii ti Disiembre 4, saan ketdi a ti mapattapatta a panagsasarita mainaig iti pannakaikkat ni Bise Presidente (BP) Sara Duterte, kas kinuna ni Diputado Paolo Ortega (La Union 1st District), Deputy Majority Leader.
Iti maysa a press conference itay Dis. 5, kinuna ni Ortega a saan a pudno dagiti pattapatta wenno kapanunotan ti dadduma a tattao, ket impaganetgetna a simple laeng a panagtitipon ti naangay a taripnong iti Malakanyang, a naitampok ti pannakaidatag ti resolusion ti suporta manipud iti Kamara.
Iti kallabes, linaon dagiti pagwarnak ti posible a pannakaikkat ni BP Duterte, numona ta saan a maysa, no di ket dua ti nayendorso nga impeachment complaint iti Kamara ita a lawas.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Ngem kinuna ni Ortega a saanda a napagsasaritaan ti maipapan iti politika ta ipamaysada ti atentionda iti panangbukuel iti linteg ken dagiti maar-aramid a panangbista.
Segun ken ni Ortega, nupay addan naibutaktak a mabalin a pagbatayan ti impeachment iti panagimbestigar nga ar-aramiden ti Committee on Good Government and Public Accountability ken ti Quad-committee (quad-comm) ti Kamara, saan pay a napagsasaritaan ti mayorya dagiti dua nga impeachment complaint. (Ellson Quismorio/Manila Bulletin//Lito Hilidon/Bannawag)
