Pagsasaritaan dagiti opisial ti salun-at dagiti wagas kontra iti panagwaras ti melioidosis iti Cagayan iti virtual forum a naangay iti Cagayan Provincial Health Office idi Dis. 5.

Sangapulo ket maysa a tao ti natay iti probinsia ti Cagayan gapu iti melioidosis, segun iti report ti Cagayan Provincial Health Office idi Biernes, Dis. 6.

Duapulo ket maysa a tao ti naduktalan a naapektaran iti nasao a sakit, 10 kadagitoy ti nakalasat.

Naggapu dagiti biktima iti Camalaniugan, Santa Ana, Alcala, Baggao, Buguey, Claveria, Gattaran, Gonzaga, Piat, Santo Niño, Solana, Tuao, ken Siudad ti Tuguegarao.

Ti melioidosis ket sakit a patauden ti bakteria a maawagan iti Burkholderia pseudomallei wenno B. pseudomallei ken agwaras kadagiti tattao ken ayup babaen ti direkta a pannakaikontak iti kontaminado a daga, angin, wenno danum.

Lokal

Puor iti kabambantayan ti Carasi, 'under control,' kuna ti BFP-Ilocos Norte

Narigat a mailasin ti addaan iti melioidosis gapu ta masapul nga agpa-blood culture nga umuna ti pasiente ket lima nga aldaw ti palabsen sa mairuar ti resulta.

Nangato ti fatality rate kadagiti tao a datin nga addaan an-annayen a kas iti diabetes, kanser, sakit ti bara, sakit ti bato, ken kasta met dagiti nakaro nga aginum iti arak.

Gagangay a sintoma ti sakit ti di maim-imbagan wenno maibaybayag a panaggurgurigor.

Kinuna ti Cagayan Provincial Information Office a ngimmato ti bilang dagiti kaso sipud nangrugi ti panagtutudo idi Agosto. (Liezle Basa Iñigo/MB)