Awan birth certificate ti nasurok a 400 a tao a nailista a kas "immawat" iti confidential fund ti Office of the Vice President (OVP) ken Department of Education (DepEd) segun ken ni Diputado ti 3rd District ti Manila Joel Chua iti maudi a session ti Committee on Good Government and Public Accountability ti Kamara ita nga aldaw, Disiembre 9.
Dinakamat ni Chua ti datos nga impaay ti Philippine Statistics Authority (PSA) itay Disiembre 8 kas kiniddaw ti komite a sukimatenda ti nagan dagiti 677 a nagpirma iti acknowledgment receipt (AR) manipud iti OVP ken DepEd.
Segun iti datos ti PSA, 405 kadagiti 677 a tao ti awanan iti birth certificate, wenno awanan iti rekord iti listaanda iti birth certificate.
Naiwayat daytoy a panagsukimat kalpasan ti report ti PSA a ti "Mary Grace Piattos" nga immawat iti confidential fund ket awanan kadagiti maitutop a rekord. Iti Filipinas, Mary Grace ti nagan ti maysa a restauran, idinto a ti "Piattos" ket maysa a brand ti tsitseria.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Segun iti report ti PSA a pinirmaan ni National Statistician ken Civil Registrar General Claire Dennis Mapa, 445 ti awanan ti marriage certificate, idinto a 508 ti awanan iti death certificate.
Kaipapananna a dagiti dadduma nagnagan a dinakamat ti PSA ket napatalgedan nga addaan iti rekord.
Maysa kadagiti 677 a nagan, ti Kokoy Villamin, ti nagparang kadagiti adu a resibo nga agsasabali ti pirmana, a mabalin a maibilang a palsipikado.
Impaganetget ti komite ti pateg ti pannakaberipikar ti kinapudno dagiti nagnagan a nailista nga umawat ti confidential funds tapno masigurado a saan a mausar ti pondo ti publiko kadagiti manangallilaw a panggep. (Ellson Quismorio/Manila Bulletin//Lito Hilidon/Bannawag)
