Binallaagan ti Department of Justice (DOJ) ti publiko ita nga aldaw, Disiembre 9, iti yaadu dagiti online scammer ita a panawen ti Paskua.
Imbalakad ni Assistant Secretary ti DOJ Jose Dominic F. Clavano IV ti naan-anay a panagridam ken panagannad ti publiko kadagiti kapatpatangda iti ania man a social media wenno messaging platform.
Segun ken ni Clavano, adu a tao ti nakatuon iti imatangda iti selponda, nangruna ita a panawen ti Paskua, ta dagiti Filipino ti kaaduan nga agus-usar iti social media, isu a nalaka a maallilaw iti kakastoy nga scam.
Impaganetget ni Clavano iti publiko nga ipulongda iti Office of Cybercrime ti DOJ ti ania man nga insidente ti online scamming.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Dinakamat ni Clavano ti napasaran ti host ti ABS CBN a ni Migs Bustos a napan iti DOJ tapno agkiddaw iti pannakaimbestigar ti online scammer nga agpampammarang a kas isuna.
Kinuna ni Bustos nga inusar dagiti scammer ti rupana, ti rupa ti asawana, ti imahe ti pamiliana, agraman dagiti nasinged a gagayyemna.
Segun ken ni Clavano, maysa a taga-Orlando, Florida (Estados Unidos) ti napukawan iti US$2,000 kalpasan a mabiktima ti scammer a nangusar iti nagan ni Bustos. (Jeffrey Damicog/Manila Bulletin//Lito Hilidon/Bannawag)
