Plunder, di umisu a pannakausar ti pondo, panagpalsipikar, ken panagpasuksok.
Sumagmamano laeng dagitoy kadagiti posible a krimen a naaramid dagiti opisial iti babaen ni Bise Presidente Sara Duterte, segun kadagiti diputado a nakipaset iti panagimbestigar ti House Committee on Good Government and Public Accountability, a makatulong iti panangpandaydanto iti linteg, mainaig iti maipagarup a di umisu a pannakausar ti P612.5 a milion a confidential fund.
Saan latta a nailawlawag ti nakaipanan ti pondo—a nabingay iti PhP500 a million iti Office of the Vice President (OVP), ken PhP112.5 a milion iti Department of Education (DepEd).
Iti maudi a session ti komite itay Disiembre 9, da Diputado Romeo Acop (Antipolo City, 2nd district), Jil Bongalon (Ako Bicol Party-list), Gerville “Jinky Bitricks” Luistro (Batangas, 2nd district), ken Johnny Pimentel (Surigao del Sur, 2nd district) ti nangibinsabinsa ken nangilawlawag kadagiti posible a krimen a naaramid dagiti opisial ni Bise Presidente Sara Duterte.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Impakaammo ti komite a dagiti confidential fund a nailatang iti OVP ken DepEd ket nairuar a maisalungasing iti Commission on Audit-Department of Budget and Management Joint Circular No. 2015-01.
Kinuna ni Luistro a nupay naaramid ti panagimbestigar ti komite ta makatulong iti panangpandaydanto iti linteg, saan a rumbeng nga agimbubulsek lattan dagiti diputado kadagiti panaglabsing iti linteg. (Ellson Quismorio/Manila Bulletin//Lito Hilidon/Bannawag)
