Mabalin a nakudkudrep ti naraniag a panangrambak ita iti Paskua dagiti pamilia a Filipino gapu iti di inanamaen nga ingangato ti singir iti konsumo iti koriente, nangruna dagiti adda iti Metro Manila ken kabangibang a probinsia.
I'toy a Martes, Dis. 10, impakaammo ti Manila Electric Company (Meralco) ti PhP0.1048 kada kilowatt-hour (kWh) a ngatuan ti electricity rates iti Disiembre, kangrunaanna a maigapu iti nangatngato a generation charge.
Segun iti Meralco, mangyeg daytoy nga adjustment iti overall rate a PhP11.9617 kada kWh para iti gagangay a household, nangatngato ngem iti PhP11.8569 kada kWh idi Nobiembre.
"Kadagiti residential customer nga addaan consumption a 200 kWh, manayonan iti upward adjustment a PhP21 ti total electricity bill-da ita a bulan,” kinuna ni Joe R. Zaldarriaga, bise presidente ti Meralco ken head of corporate communications.
Mayawiden ti bangkay ti napapatay a Filipina iti Slovenia, segun iti DFA
Inlawlawag ni Zaldarriaga a ti panagngato ti generation charge ket maigapu iti nangatngato a gastos iti Wholesale Electricity Spot Market (WESM) ken Power Supply Agreements (PSA).
Ngimmato ti singir ti WESM iti PhP0.2531 kada kWh gapu iti naing-inget a kasasaad ti suplay iti Luzon grid, idinto a ngimmato ti singir ti PSA iti PhP0.1050 kada kWh gapu iti panagbaba ti pateg ti pisos ken nababbaba nga average dispatch. (Gabriell Christel Galang/MB)
