Paset ti pagrebbengan ni Presidente Ferdinand 'Bongbong' Marcos Jr. a kas commander-in-chief ti pagilian ti nangato a panaggasto ti Office of the President (OP) iti confidential funds ken intelligence funds idi 2023, segun kadagiti mammanday-linteg.
Maibatay iti annual financial report ti Commission on Audit (COA), nakagastos ti OP iti PhP4.56 bilion idi 2023--kangatuan iti listaan dagiti gastos dagiti ahensia ti gobierno.
Iti maysa a press conference, kinuna ni Manila 3rd district Rep. Joel Chua a ti panaggasto iti kastoy a gatad ket prerogatibo ni Marcos kas arkitekto ti military policy ti Filipinas.
“Gapu ta trabaho ken pagrebbengan ti presidentetayo ti kina-commander-in-chief ti armado a puersa ti pagiliantayo. Pakaseknanna ti national security," kinuna ni Chua, chairrman ti House Committee on Good Government and Public Accountability.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Nagriri met dagiti mangsupsuportar ken ni Bise Presidente Sara Duterte ket nagpaskilda iti kritisismo iti social media kontra iti panel ni Chua gapu ta segun kadakuada, masing-single out ni Duterte ket isu laeng ti im-imbestigaren iti kongreso.
Im-imbestigaren ti panel, a maawagan pay iti House Blue Ribbon Committee, ti mapapati a di umisu a pannakausar ti PhP612.5 a milion a confidential funds ti Office of the Vice President (OVP) ken ti Department of Education (DepEd) iti panagtakem ni Duterte kas secretary.
Kinuna met ni 1-RIDER Party-list Rep. Rodge Gutierrez a saan pay nga imbestigaren ti panel ti panaggasto ti OP iti confidential funds ken intelligence funds gapu ta awan pay ti inruar ti COA a disallowance notice.
“Awan ti notice of disallowance iti OP ket dayta ti gapuna nga awan ti nangipila iti ania man a privilege speech wenno resolution,” kinuna ni Gutierrez.
“Iti OVP, adda notice of disallowance. Isu a mabalin a maysa dayta a pakaidumaanna iti OP,” innayon pay ni Gutierrez.
Kinuna pay ni Gutierrez a limitado ti Blue Ribbon panel iti panagimbestigar iti confidential funds. Segun kenkuana, kaaduan a nabusbos iti PhP4.56-milion ti OP idi napan a tawen ket intelligence funds, a mainaig kadagiti pakaseknan iti national security.
“No adda nangipila iti privilege speech wenno resolution, maipapan iti Presidente, no naduktalan a maus-usar dagita a funds kadagiti banag a saan a mainaig kadagiti iti umno a pakausaranda, panagkunak ket kitaen met ti komite dayta a banag,” inlawlawag ni Gutierrez. (Dexter Barro II/Manila Bulletin)
