Pinagtalinaed ti Bicameral Conference Committee (bicam) ti PhP733 a milion a badiet ti Office of the Vice President (OVP) iti singasing a PhP6.352 a trilion a 2025 General Appropriations Bill (GAB).
Daytoy ti impkaammo ni Senadora Grace Poe, daulo ti Senate Finance Committee, kalpasan nga inanamongan ti bicam ti pinal a bersion ti 2025 GAB ita nga aldaw, Disiembre 11.
Kinissayan ti Kamara iti PhP1.3 a bilion ti singasing a pondo ti OVP iti 2025 GAB, ket pinagtalinaed daytoy ti Senado.
Segun ken ni Poe, saan a nagkiddaw ti OVP iti nayon a pondo agingga a naidatagen ti committee report, ket kinuna ti OVP nga itaklindan iti Kongreso ti mailatang a pondoda.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Inlawlawag ni Poe a kabaelan latta ti OVP ti mangipaay iti serbisio ta adda ti badietda a PhP600 a milion para iti social services.
Iti sabali a bangir, nagyaman ni House Speaker Martin Romualdez kadagiti senador iti panangsuportarda met laeng iti Ayuda sa Kapos ang Kita Program (AKAP), a sinupiatda idi damo.
Segun ken ni Diputado ti Ako Bicol Party-list Zaldy Co, daulo ti House Committee on Appropriations, PhP26 a bilion ti nailatang a pondo ti AKAP iti 2025 GAB. (Dhel Nazario/Manila Bulletin//Lito Hilidon/Bannawag)
