Agarup PhP44 a milion a balor ti ilegal a droga ti nasamsam ken 63 a katao ti nakemmeg dagiti kameng ti Drug Enforcement Group ti Philippine National Police (PNP-DEG) kadagiti insayangkatda nga operasion idi Nobiembre itoy a tawen.
Segun ken ni Brig. Gen. Eleazar Matta, Direktor ti PNP-DEG, aganay a 62 nga operasion, a pakairamanan ti 36 a buy-bust ken marijuana eradication operation, ti insayangkatda idi napan a bulan kas paset ti programa kontra iti ilegal a droga.
Nasamsam kadagiti operasion ti dandani 5 a kilo ti shabu, 230 milliliter a marijuana oil, 46,800 a mula a marihuana, ken 6,311 a gramo ti nagango a marihuana.
Iti kallabes, imbilin ni hepe ti PNP Gen. Rommel Francisco Marbil kadagiti police commander ti nainget a panangsurotda iti linteg, iti kalintegan ti tao ken dagiti umisu a wagas ti panagisayangkat iti operasion iti panangipatungpalda iti programa kontra iti maiparit a droga.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Paset daytoy ti "less bloody drug war" a rinugian nga impatungpal ti administrasion ni Presidente Marcos idi Hulio 2022 iti baet ti pannakababalaw ti anti-illegal drug campaign nga insayangkat ti naglabas nga administrasion. (Aaron Recuenco/Manila Bulletin//Lito Hilidon/Bananawag)
