Sinupiat dagiti dadduma a Senador ti pangngeddeng ti bicameral conference committee a saan a maikkan iti pondo ti Philippine Health Insurance Corp.(PhilHealth), iti singasing a badiet para iti 2025.
Kinuna ni Senadora Grace Poe, daulo ti Senate Finance Committee, a napagnunumuan dagiti mammanday-linteg a saandan nga inikkan iti pondo ti PhilHealth 'tangay adda pay ti PhP600 a bilion a nakadulin a pondo ti ahensia a di nausar.
Ngem segun ken ni Deputy Minority Leader Senadora Risa Hontiveros, uray pay adda nasurok a pondo ti PhilHealth, nasken latta a ponduan ti gobierno daytoy kas maibatay iti PhilHealth Charter, ti Sin Tax Law, ken ti Universal Health Care (UHC) Act. Isu saan a nainkalintegan, ilegal ken mabalin a mailabsing iti konstitusion daytoy.
Innayon ni Hontiveros a nupay masapul a mailinteg ti nagkurangan ken nagbiddutan dagiti mangimatmaton iti PhilHealth, saan a rumbeng nga agsagaba dagiti miembro daytoy.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Kinuna met ni Sen. Christopher “Bong” Go, daulo ti Senate Committee on Health and Demography, a reprepasuenna ti Bicam Report ket adda dagiti pagduaduaanna pay laeng a probision kangrunaan ti pannakaikkat ti pondo ti PhilHealth ket idatagnanto dagiti natakuatanna inton maratipikaran ti Bicam Report iti plenario.
Inanamongan ni Sen. Sherwin Gatchalian ti saan a pannakaipaay ti pondo ti PhilHealth tapno mausar ti PhP600 a bilion nga iduldulin ti ahensia.
Patien ni Sen. Joseph Victor “JV” Ejercito a mabalin a makuestionar ti nasao a pangngeddeng ti Senado iti Korte Suprema, ngem masapul met a kitaen ti dakkel a reserba a pondo ti PhilHealth. (Hannah L. Torregoza/Manila Bulletin//Lito Hilidon/Bannawag)
