Immadu ti sulphur dioxide (SO2) nga ipugpugso ti Bulkan Kanlaon, segun iti pakaammo ti Philippine Institute of Volcanology and Seismology (Phivolcs) ita nga aldaw, Disiembre 12.
Maibatay iti panangrukod ti Phivolcs, addan 7,019 a tonelada ti SO2 nga impugso ti bulkan idi Disiembre 11, dandani mamindua iti 4,121 a tonelada a nairekord 24 nga oras sakbayna.
Daytoy a yaadu ket gapuanan ti panagbettak ti Bulkan Kanlaon iti Disiembre 9 a nangyeg iti dapo ken pyroclastic density currents kadagiti paset ti Negros Island.
Ti nangato a lebel ti SO2 ti maysa kadaigiti kangrunaan a pagilasinan ti agtultuloy a panagbettak ti bulkan.
Mayawiden ti bangkay ti napapatay a Filipina iti Slovenia, segun iti DFA
Gapu ta adda panagbettak ti Bulkan Kanlaon idi Hunio 3, kinuna ti Phivolcs a kanayon a mangipugso ti Kanlaon iti nangato a lebel ti SO2, a ti kangatuan a nairekord a naipugsona ket 11,556 a tonelada iti tunggal aldaw idi Septiembre 11.
Agtalinaed ti dati a nayetnag nga Alert Level gapu iti kimmaro a volcanic wenno magmatic unrest, a mangipasimudaag iti posibilidad ti ad-adu pay a panagbettak.
Naibilinen kadagiti local government units (LGUs) nga ipanawda dagiti agindeg iti uneg ti 6-kilometer radius iti pantok ken agtalinaedda a sisasagana kadagiti ad-adu pay a pannakaibakuit dagiti residente no kumaro pay ti situasion. (Ellalyn De Vera-Ruiz/Manila Bulletin//Lito Hilidon/Bannawag)
