Kalpasan ti lima a tawen, impalgak ni OPM icon Geneva Cruz a nakasarak manen iti kabarbaro nga ayat ket innaganna daytoy a ni Dean Roxas, Southeast Asian Games jiu-jitsu national athlete ken gold medalist.
Impalgak ni Geneva, 45, ti baro a nobiona kabayatan ti launching ti umuna a Christmas song-na, ti "When Christmas Song," a naangay iti Pandan Asian Restaurant iti Morato, Quezon City, idi Dis. 11.
"Espesial kaniak daytoy a Paskua gapu ta linuktak manen ti bagik iti ayat. Amang a naragragsakak ita," kinuna ni Geneva idi nasaludsod no kasano a mariknana ti kaipapanan ti Paskua ita.
Idi damo a damagen ti media, clues laeng ti inted ni Geneva maipapan iti kaayan-ayatna. "Maysa isuna a nailian nga atleta," kinuna laeng.
Mayawiden ti bangkay ti napapatay a Filipina iti Slovenia, segun iti DFA
Ngem idi kuan, inaminna met laeng a karelasionna ti jiu-jitsu national athlete ken gold medalist iti SEA Games a ni Dean Roxas.
Immuna a nakiasawa ni Geneva ken ni Paco Arespacochaga, dati a drummer ti banda nga Introvoys. Naaddaanda iti anak nga agnagan iti Heaven.
Kalpasan a nawaswas ti kasarda ken Paco, nakiasawa ni Geneva iti TV host a ni KC Montero. Nagsinada kalpasan ti 10 a tawen.
Nakirelasion met ni Geneva iti Filipino-Australian a ni Lee Paulsen ket adda anakda nga agnagan iti London. (Robert Requintina/MB)
