Kiniddaw ti grupo dagiti mangngalap ken enviromenmental advocates iti Supreme COurt (SC) ti pannakaisardeng dagiti maisaysayangkat a nadumaduma a proyekto ti reclamation (pananggabur) ken seabed quarrying (panagkurob iti darat iti lansad ti baybay) iti Manila Bay babaen ti petision para iti Writ of Kalikasan.
Maysa a legal a remedio ti Writ of Kalikasan para ioti pannakasalaknib ti karbengan ti maysa a tao para iti nasalun-at nga aglawlaw, a kas sagudayen ti Konstitusion.
Impila ti Pambansang Lakas ng Kilusang Mamamalakaya ng Pilipinas (Pamalakaya) ken ti Kalikasan People’s Network for the Environment (Kalikasan) ti nasao a petision iti SC idi Disiembre 11.
Nainaganan a kas respondents iti petision ti Department of Environment and Natural Resources (DENR) ken ti Philippine Reclamation Authority (PRA).
Mayawiden ti bangkay ti napapatay a Filipina iti Slovenia, segun iti DFA
Segun kadagiti nagpetision, indatagda iti SC ti "pannakariribuk a mapaspasaran dagiti komunidad iti aglawlaw ti Manila Bay gapu kadagiti umad-adu ken agpaut a makapadakes nga epekto dagiti aktibidad ti panagkurob ken panaggabur iti Manila Bay."
Kinunada pay a dagiti dua nga ahensia ti gobierno (DENR ken PRA) “inaprobaranda dagiti proyekto a reclamation ken dredging iti laksid ti makapadakes nga epekto dagitoy iti pagbiagan ti 300,000 a mangngalap, ken iti pagilian iti pakaseknan ti seguridad ti tarao ken patrimony." (Rey G. Panaligan/MB)
