KUNA dagiti gagayyemko a nauyong ken agkagat ti aso nga aspin. Ngem saan met a kumagat dagiti aspin a natartarakenko. Ti ketdi kumagat nga asok ket maysa a puro a Shih Tzu. Isu daytoy ni Kisses.
Idi uken pay laeng ni Kisses, naamo ken makiay-ayam kadagiti tattao. Itugtugotko pay idi iti eskuela. No sumangpetkamin iti eskuela, bilinek nga agtugaw ken agtalna ta mangisuroak. Ta inton oras ti panagmemerienda, isunton ti pannakiay-ayamna kadagiti pupils-ko. Denggenna met ti ibilinko kenkuana. Agtugtugaw ken agbuybuya bayat ti panagklasklasek. No iti orasen iti panagmemerienda, taulannakon ta ibagana siguro a bumaban iti tugaw a nangidissuak kenkuana. Idissaagko ngarud ket naragsakton a makiay-ayam kadagiti pupils-ko. Adda mangarakup kada mangubba kenkuana. Dina met ida a kagaten. Agkalkalawikiw ketdi. Magusgustuanna ti makiaay-ayam.
Agingga nga iti maysa nga aldaw, natay ni Hershey, ti Shih Tzu nga aso ti kabsatko. Daytoy nga aso ti playmate ni Kisses no addakami ti balay. Naapektaran unay ni Kisses iti pannakatay ti aso a kaay-ayamna. Nagbalin a naliday. Minalem nga ipasiarko iti parke tapno mailiwliwagna ti pannakatay ti playmate-na. Naragsak met no agtaraytaray iti parke. Ngem inton sumangpekamin iti balay, makitakto manen kadagiti matana a nakalidliday. Agtugtugaw iti ridawmi a kasla paspasungadenna ni Hershey. Agingga a madlawkon ti kinuttonganna.
Impanko ni Kisses iti Vet Clinic. Kunada a depression ken anxiety ti sakitna. Insingasing ti beterinario a yalaak ti sabali a playmate-na. Gimmatangak ngarud iti maysa pay nga aso. Idi isangpetko iti balaymi ti uken a Japanese Spitz, permi a ngerngeran ni Kisses. No mabalin la koma, dina kayat a pastreken ti uken iti balaymi.
APO ABOGADO (5): Ti Kaso a Sexual Harassment iti Maysa nga Unibersidad
Kinasaok ngarud ni Kisses. Imbagak kenkuana a kaay-ayamna ti baro nga uken. Mulmulagatannak met. Siguro, naawatanna ti imbagak kenkuana.
Kalpasan ti makalawas, aggayyemen da Kisses ken ti uken a pinanaganak iti Chippy. Agkaayamandan.
Ngem adda latta dagiti gundaway a masintirko a naliday ni Kisses. Sapsapulenna latta ni Hershey. Agingga a dina payen kayat ti makiay-ayam kadagiti ubbing. Ngerngeranna payen dagiti umay a sangailik. No adda sumangpet a sangailimi, saan met nga agtaultaul. Mulmulagatanna laeng ti sangailimi. Ngem apaman a makastrek ti sangailimi iti balay, dagus a sikbabennan daytoy.
Naimbag la ketdin ta mamindua iti makatawen nga agbakuna ti asok iti anti-rabies. Nupay kasta, no kiddawen ti nakagatna a paagasak, siempre, kuyogek ken ikkak iti igatangna iti mayindieksion nga anti-rabies. Mapawingiwingak no kua aglalo ket nakakinngingina ti bayad ti injection a para anti-rabies.
Gapu ta naalas daytoy a galad ti asok, inam-amirisko no apay a kumagat. Addada met sangailimi a dina an-anuen.
Agingga a natakuatak no apay a kagaten ti asok dagiti dadduma a masangailik. Gayam, kagurana unay ti bislak (stick) nga iggaman ti sangailik a kas usarenna a pangsalaknib iti bagina. Bunga pay siguron ti pannakapukawna kenni Hershey a playmate-na, isu a nagbalin a kastoy isuna. Kasaritak ngarud ti tunggal sangailimi a dida agiggem iti bislak ta kagura ni Kisses. Ken aggarawda a kasla bumalay laeng ken dida ipadpadlaw iti asok a kabutengda daytoy.
Ngem tapno masiguradoak nga awan dangranna (ta nagngina ti injection a para anti-rabies) ubbaek ni Kisses a yadayo kadagiti sangailimi ta amangan no dida maaluadan nga aprosan ket kagatenna ida.
Saan a pulos a nailiwliwag ni Kisses ti pannakapukawna ken ni Hershey nga isu ti patiek a gapuna a nagbalin a naatap ken pasaray kumagat daytoy. --O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)
(Bannawag, Mayo 1-16, 2023)
