Inaramat ni Diputado Jude Acidre ti Tingog Party-list ti social media a nangsungbat iti panangbabalaw ni Senador Ronald "Bato" dela Rosa iti health development program ti Tingog Party-list, a pakairamanan met ti Philippine Health Insurance Corporation (PhilHealth) ken Development Bank of the Philippines (DBP).
Iti paskil ni Acidre iti Facebook itay Disiembre 11, kinunana a ti panangkuestionar ni dela Rosa iti Memorandum of Agreement (MOA) a nagpinnirmaan ti Tingog Party-list, DBP, ken PhilHealth iparangarangna a biddut ti impormasionna (misinformed) ken makapaburibor gapu iti napalabas ken panggepna.
Segun ken ni Acidre, awan politika iti pannakairaman ti Tingog iti MOA.
Kinuna ni Acidre a nalawag ti panggep ti MOA: tapno mataming ti dakkel a pagkurangan iti impraestruktura ti panangtaripato iti salun-at, nangruna kadagiti adda iti away ken lugar a saan a maipapaayan iti tulong. Innayon ni Acidre a saan a bileg wenno panangkontrol ti panggep ti Tingog no di ket ti mangipaay iti solusion tapno mapasayaat dagiti local government units (LGUs) ti pannakaidanon ti serbisio iti salun-at.
Mayawiden ti bangkay ti napapatay a Filipina iti Slovenia, segun iti DFA
Inlawlawag ni Acidre a saan a ti Tingog ti mangiggem iti pondo, mangimaton iti proyekto, wenno mangsakup iti annongen ti Department of Health (DOH) wenno ti Department of the Interior and Local Government (DILG), ta agtalinaed dagitoy nga ahensia a sentro ti nailian a programa iti panangtaripato iti salun-at.
Kinuna pay ni Acidre a tungpalen ti MOA ti amin a legal a pagannurotan ta ti laeng DBP ken LGU ti akimbiang dagiti banag maipanggep iti kuarta, ken awan ti maited a pondo iti Tingog. Innayonna a marukod koma daytoy a katulagan ti panagkadua babaen ti panggep ken pagbanaganna, saan ketdi a babaen dagiti awan nakaibatayanna a pattapatta ni Senador dela Rosa. (Ellson Quismorio/Manila Bulletin//Lito Hilidon/Bannawag)
