NO kaadu ti apit a bawang, gagangay a nalaka ti presio. Isu nasayaat no ammotayo ti umno a panagidulin iti apit a bawang ta mabalin nga ilakotayto inton kakirangna ken kanginana. Ngem masapul nga ammotayo ti umno a panagidulin ta no saan, mabalin a kagudua ti mapukaw nga apit gapu iti panangkapet dagiti agdadael nga insekto.
Dagiti laglagipentayo maipanggep kadagiti idulintayo a bawang:
· Pilien a nasayaat dagiti barayti ti bawang nga imula. Mairaman ditoy dagiti barayti a Cabuyao, Ilocos White, ken Tan Bolters.
· Gabuten wenno apiten laeng dagiti natangkenan a bawang.
TULONG ITI MANNALON: Ammom Met Laeng ti Umno a Panagabono?
· Idulin laeng dagiti nasayaat ti kalidadna a bawang. Akaran dagiti adda perdina a bawang dagiti nasayaat ken nangato ti kalidadna no di mailasin dagitoy. Al-alisto a maapektaran iti sakit dagiti adda dunorna a bawang.
Tallo a Wagas ti Panagidulin
1. Panangitabnaw iti agburburek a danum
* Ibilag dagiti bawang iti manipud 7 agingga iti 10 nga aldaw.
* Kalpasanna, itabnaw dagiti bawang iti agburburek a danum iti 10 a segundo.
* Ibilag manen daytoy iti maysa nga aldaw. Payangyangan met iti maysa nga aldaw.
* No napayangyanganen, mabalinen nga idulin dagiti bawang iti karton wenno paper boxes.
2. Panagidulin iti karton wenno paper box a maparabawan iti bulong ti dangla
* Ibilag dagiti bawang iti manipud 7 agingga iti 10 nga aldaw.
* Bugguan a nasayaat dagiti bulong ti dangla. Ibilag iti manipud 2 agingga iti 3 nga aldaw agingga a marumrumek dagiti bulongna.
* Idulin dagiti bawang kadagiti karton wenno paper boxes. Kada inap ti bawang, parabawan iti kaibatogan ti sangakilo a napagango a bulong ti dangla ti 20 a kilo a bawang.
* Sukatan dagiti bulong ti dangla iti kada 4 a bulan.
Panagpempen a karaman ti bulong ti dangla
* Ibilag dagiti bawang iti manipud iti 7 agingga iti 10 nga aldaw.
* Ipempen dagiti napug-ong a bawang. Ikkan iti nagango ken narumrumek a dangla iti nagbabaetan ti pempen iti kaibatogan ti sangakilo a presko a bulong ti dangla ti kada 20 a kilo a bawang.
* Sukatan dagiti bulong ti dangla kalpasan ti 4 a bulan.
Benepisio
* Saanen a kasapulan ti kemikal a pestisidio. Ngarud, natalged nga ipauneg ti bawang ken iti
aglawlaw.
* Epektibo iti pannakalapped dagiti peste bayat ti panakaidulin dagiti bawang.
* Bassit ti magasto ken makaited iti nangato a ganansia. --O
